2026 чылдың август айда Тываның найысылалы Кызыл хоорайга болуп эртер делегей чергелиг IV сарыг шажыг шуулганга белеткел ажылдары амгы үеде республикада чоруп турар.
Шуулганның кол программазы болуп эртер чери Кызыл хоорайда чаартылга ажылдары кидин түлүк. Найысылалдың төп Ленин кудумчузунда чаартылга-септелге ажылдарын “Восток” кызыгаарлаттынган харыысалгалыг ниитилел чорудуп турар.
Тыва эки турачылар кудумчузундан Национал паркка чедир кварталдар чаартылганың түңнелинде таныттынмас апаар деп чугаалап болур. Ленин кудумчузунуң бо кезээнде автомобиль оруун аай-дедир угланыышкынныг дөрт дилиндектиг кылдыр калбартыр, машиналар тургузар шөлдерниң хемчээлин улгаттырар, чадаг кижилер кылаштаар тротуарны брусчатка-биле шывар. Автомобиль оруу биле тротуар аразынга бедидир өстүрген ыяштарны олуртуп, черни ногаанчыдар. Кудумчунуң дүнеки чырыдылгазын экижидип, күштүг чаа сайгылгааннарны чагыларга азар. Төп Ленин кудумчузунуң ийи талазында Кочетов биле Щетинкин-Кравченко кудумчуларже оруктарны база чаартып септеп турар.
Тыва эки турачылар кудумчузундан Национал паркка чедир автомобиль оруунуң болгаш тротуарның эрги шывыын соя сөп, ону хоорай даштында тускай шөлче үндүр сөөрткеш, оруктуң адаккы шывыын белеткээр ажылдар адакталган. Амгы үениң эки шынарлыг, быжыг асфальтызы-биле оруктуң кырыкы дески каъдын шывар ажыл удавас эгелээр.
Ш. Моңгуш