Тыва 2026 чылдың август айда болуп эртер делегей чергелиг IV сарыг шажын шуулганынга белеткенири-биле, республика улуг ажылдарны кылыр апаар деп, Тываның Баштыңы Владислав Ховалыг декабрь 11-де дорт дамчыдылга үезинде дыңнаткан. Аңгы-аңгы угланыышкыннар аайы-биле белеткел ажылдары эгелээн.
Удавас болур шуулганны организастаарынга болгаш эрттиреринге дорт киржир албан черлериниң аразында республиканың күрүнениң туризм комитеди хемчегниң киржикчилеринге таарымчалыг байдалдарны болгаш айыыл чок чорукту хандырар инфратургузугну болгаш кадрлар айтырыгларын шиитпирлеп турар.
Албан чериниң дыңнатканы-биле алырга, Тываның культурлуг болгаш төөгүлүг өнчү салгалын бедик деңнелге таныштырып шыдаар шыырак мергежилдиг – профессионал кадрлардан команданы тургузуп, белеткээр ажылдар чоруп турар. Шак ындыг тускай мергежилдиглер республикада бар: бо чылын аттестация комиссиязының үш хуралы эрткен, ооң түңнелинде чеди үдекчи-экскурсовод шыырак билиглиин бадыткаан. Тываның күрүне университединиң баазазында эде белеткел программазын эрттирип турар, ону 46 кижи дооскан.
Аалчылар чурттаар черлер санын улгаттырар ажылдарны база эгелээн. Күрүне комитединиң тускай мергежилдиглери Кызылда коллективтиг чурттаар черлерни сайгарып көргеш, ниитизи-биле 322 өрээлдиг 13 аалчылар бажыңының даңзызын тургускан. Аалчыларга чурттаар немелде аргаларны сүмелептер хонуктап чурттадыр бажыңнарлыг болгаш апартаментилерлиг хуу секторну база сайгарып турар. Эң чымыштыг үелерде ол чугула херек.
Айыыл чок чорук негелделеринге дүүштүр шупту оран-саваларны кылыр. Аалчыларны хүлээп алырынга киржир объект бүрүзү классификацияны эртип, айыыл чок чоруктуң паспортун алыры албан.
Экскурсия болгаш трансфер ачы-дузаларының рыногун база сайгарып турар. Хыналда эрткеннерниң даңзызын тургускан, бөгүнде сертификаттыг сес туроператор болгаш беш транспорт компаниязы шуулганның культурлуг болгаш логистика программаларын хандырып болурун бадыткаан.
ТР-ниң күрүнениң туризм комитеди комплекстиг бо ажылдар сарыг шажын шуулганын бедик деңнелге эрттирер дээш инфратургузуг болгаш кадрлар баазазын тургузарындан аңгыда, аалчыларга болгаш киржикчилерге таарымчалыг байдалдарны хандырып, Тывада бүгү турисчи адырының стандарттарын үр хуусаалыг перспективада бедидер ужурлуг.