Ивижилер фестивалын муң ажыг кижи сонуургап көрген

Тожу кожуунда «Шулун» көдээ ажыл-агый бүдүрүлге кооперативи биле «Өдүген» муниципалдыг унитарлыг бүдүрүлге иви малды азырап өстүрүп турар. Амгы үеде ында ниитизи-биле 1257 баш иви бар.

Тожу кожууннуң чагырга чериниң даргазы Буян Ондарның дыңнатканы-биле алырга, кожуун девискээринде чымыштыг ажыл-иштиг, чай-кыш чок тайга кезип, иви малын өстүрер дээш шудургу ажылдап чоруур 45 ивижи бар. Оларның 44 хуузу аныяктар.

2022 чылда ниитизи-биле чеди сая рубльге үрдүрер хемелер, харга чоруур техника, спутник таварыштыр ажылдаар телефоннар, чылыг майгыннар, хүн херели-биле ажылдаар станцияларны ивижилерге саткаш, үлээнин ТР-ниң Көдээ ажыл-агый яамызы дыңнаткан.

Бо чылын бир баш иви дээш субсидия акшазы 1500 рубльден 2236 рубльге чедир өскен. Бо бүгү күрүне деткимчези иви малдың баш санын өстүреринче көрдүнген.

Эрткен неделяда Тываның Баштыңы Владислав Ховалыг-биле Россия Федерациязының Соңгу чүк, Сибирь болгаш Ыраккы чөөн чүктүң биче буурай үндезин чоннар ассоциациязының президентизи Григорий Ледков кады ажылдажылга керээзинге аттарны салган.

Документиде федералдыг болгаш регион программаларын боттандырарынга кады киржирин база деткиирин, социал-экономиктиг болгаш культурлуг хөгжүлдеге хамааржыр информастыг ажыл-чорудулганы боттандырарын, биче буурай үндезин чоннарның айтырыгларын шиитпирлээринче база эрге-ажыын камгалаарынче угланган хемчеглерни кады эрттирери көрдүнген.

Тожунуң Тоора-Хем суур чанында бирги оймакка болуп эрткен ивижилер фестивалының киржикчилери база аалчылары ивилер-биле тырттыржып, аңныыр тывыжының, бойдус байлааның делгелгезин, тус чер ус-шеверлериниң кылганы уран чогаадылга чүүлдерин, тос чадырларже болгаш өглерже кирип, ивижилерниң амыдыралын сонуургаан.

ТР-ниң Националдар херектериниң талазы-биле агентилелдиң баш бурунгаар берген медээзи-биле алырга, байырлалды бир муң ажыг кижи сонуургап көрген.