Тываның Чазаа Дус-Хөл хөлге база «Дүрген» заказнигинге барганы дээш төлевирни доктааткан. Июль 17-ден эгелээш келген кижилерден чыгдынган акша-төгерикти бойдус объектилериниң девискээринде турисчи-рекреация инфратургузуун тударынче, девискээрни ажаап-карактаарынче угландырар.
Тываның Баштыңы май эгезинде Дус-Хөл база Чагытай хөлдерже ажылчын сургакчылаашкын-биле чорааш, Дус-Хөл хөлдү долгандыр девискээрни чаагайжыдар база электрофикастаар ажылды эгелээр даалганы берген.
Эрткен неделяның төнчүзүнде Владислав Ховалыг ажылдар кайы хире чоруп турарын хынап четкен. Дус-Хөл хөлде автомобильдер тургузар черни тускайлаан, хөлдү дургаар кижи кылаштаар черни ыяш-биле чаткан, бок төгер бункерлерни тургускан. «Кылыр ажыл ам-даа хөй-дүр. Чырыкты шөйүп, киирер, ижер, чунар арыг суг-биле хандырар, эштир черни чаагайжыдар ажылдарны доозар» – деп, регион баштыңы бижээн.
Планнаттынган хемчеглерже чарыгдалдар албан үнер. Дыштанып келгеннерниң киирген төлевири Дус-Хөлдүң девискээрин чаагайжыдар база электрофикастаар, ол ышкаш бойдус объектилериниң девискээрлерин ажаап-карактаарын организастаар чарыгдалдарны дуглаарынче үнер. Азы, дыштаныкчылардан чыгдынган акша-төгерикти оларга таарымчалыг байдалдарны тургузарынче угландырар.
ТР-ниң Чазааның 2022 чылдың июнь 9-та №364 доктаалы езугаар, Тыва Республиканың онза хайгааралдыг бойдус девискээрлериниң дирекциязының ажылдакчылары хөлдерже база Дүрген шуралгаанче барганының төлевирлерин чыыр. Ооң хемчээли – 100 рубль.
Регионнуң Чазаа республика деңнелдиг онза хайгааралдыг бойдус девискээрлери – «Дус-Хөл хөл» бойдус тураскаалы биле «Дүрген» күрүнениң бойдус заказнигинге барганы дээш төлевир хемчээлин доктаадып, кирериниң дадывырын төлевес бөлүктерниң даңзызын тургускан.
Онза хайгааралдыг бойдус девискээрлер кызыгаарының чоогунда чурттакчылыг черлерниң чурттакчыларын дээш, чиигелделиг өске-даа хамаатыларны дадывыр төлевиринден хостаанын документиде айыткан.
Тываның Чазааның албан езузунуң сайтызындан азы эрге-хоойлу информациязының албан езузунуң интернет-порталындан доктаалдың сөзүглели-биле таныжып болур.
#Тываныңчазаа #Дус_хөл #Дүрген #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
Июнь 17-ден эгелээш хөлдерже база Дүрген шуралгаанче барганының төлевирлерин чыыр
16 июня 2022
75