Тывада «Көдээ черниң башкызы» федералдыг программаже мөөрей шилилдези эгелээн. Кадрлар чедишпес көдээ школаларже база хоорайларже башкыларны хаара тудары – кол сорулга.
Мониторингиден алырга, республиканың ниити өөредилге албан черлеринде 200 хостуг олут бар. Сан башкылары (41), англи дыл башкылары (30), орус дыл болгаш чогаал башкылары (27) школаларга эң херек. Оон аңгыда эге класстар, физика, информатика башкылары дээш, өске-даа эртемнерге тускай мергежилдиглер негеттинип турар.
17 чурттакчылыг черлерже башкылаарын чалаан 25 тускай ажылчын олут даңзызын 2026 чылдың программазынче киирип бадылаан. Шилилгени чедиишкинниг эрткеш, ажылче көжүп кирген башкылар чаңгыс удаа бээр компенсация төлевирин алыр.
Программада эң хөй ажылчын олуттарны сан башкыларынга (7), англи дыл башкыларынга (5) тускайлаан.
Республиканың шупту кожууннары – Бай-Тайгадан Эрзинге чедир, ол ышкаш Ак-Довурак хоорайда география башкылаар хостуг олуттар бар. Тээли школазынга физика башкызы, Аржаан школазынга төөгү башкызы, Солчур школазынга химия башкызы херек.
2026 чылдың апрель 15-ке чедир билдириишкиннерни хүлээп алырын сагындыраал. ТР-ниң Өөредилге яамызының албан езузунуң сайтызында хостуг олуттар, киржир кандидаттарга байдалдар болгаш негелделер дугайында тодаргай медээни салган.