«Көдээ черниң тренери» программаже киржикчилер шилилгези уламчылап турар

Тывада «Көдээ черниң тренери» федералдыг программаның мөөрейинче немелде шилилгени чарлаан. ТР-ниң Спорт яамызының дыңнадыы-биле алырга, республиканың чеди муниципалдыг тургузугларда спорт школаларынга тренер башкыларның хостуг олуттарынче немелде мөөрей чоруп турар.

Өвүр кожууннуң Хандагайты суурга кикбоксинг, Таңды кожууннуң Дүрген суурга бокс, Улуг-Хем кожууннуң Арыг-Үзүү суурга хостуг хүреш, Ак-Довурак хоорайга спортчу хүреш тренерлери херек. Бай-Тайга кожууннуң Хемчик биле Бай-Тал суурларында хостуг хүреш база Каа-Хем кожууннуң Сарыг-Сеп суурда бокс тренерлериниң хостуг олуттары база ажык.

Июнь 1-ден июнь 30-ге чедир программага киржир күзелдиг кижилерден билдириишкиннерни хүлээп алыр. Дараазында бөлүк документилерни белеткээр: паспорт, эртеминиң дугайында диплом, билиг-мерегжилин бадыткан документилериниң хоолгалары (бир эвес бар болза), күш-ажыл дептери, ИНН, СНИЛС, ат-сывын өскерткенин бадыткап турар документилер хоолгазы (бир эвес бар болза). Ол ышкаш шииттирип чорбаан азы кеземче истелгезинге турбаан дугайында справка болгаш өске-даа документилерни киирер. Тодаргай медээни ТР-ниң Спорт яамызының эрге-хоойлу, кадрлар, организастыг болгаш экономиктиг хандырылга килдизинче долгааш айтырып болур: тел. 8 (39422) 5-09-21, немелде дугаар – 201.

«Көдээ черниң тренери» программага киржир күзелдиглер регионалдыг, албан чери азы күрүне шаңналдарын база ажыл-чорудулганың чогуур адырынга хамаарышкан эртем чадазын бадыткаан документилери бар болза, база кожуп болур.

«Көдээ черниң тренери» программа Президент Владимир Путинниң эгелээшкини-биле Россияга бо чылын ажылдап эгелээн чаа программа дээрзин сагындыраал. «Көдээ черниң башкызы», «Көдээ черниң фельдшери» программалар ышкаш, 50 муң чедир чурттакчылыг көдээ черлерже тускай мергежилдиглерни хаара тудуп, көдээ чурттакчыларга спортчу ачы-дузаның чедингирин бедидер сорулгалыг программа болур.

Программаның киржикчилери деткимче кылдыр чаңгыс катап бээр бир сая рубльдиң төлевирин алыр. Ол ышкаш күш-ажыл керээзин чарган хүнүнден эгелеп албан-дужаалынга 5 чыл ажылдаары албан. Бо чылын Тывада «Көдээ черниң тренери» программа-биле 24 тренер башкыны ажылга хаара тудары планнаттынган.