Көктүг-шыктыг Могайның малчыннары

Бии-Хем кожууннуң Өөк сумузундан «Чаа сорук» төлевилелиниң 2021 чылдың киржикчилери – Алексей биле Сайсуу Байкаралар. Олар көктүг-шыктыг Могай деп черде малчын турлаан тудуп алганнар.

Малчыннар күрүнеден алган 20 баш хунажын инээниң баш санын өстүрүп көвүдеткеш, ийи чыл эрткенде, кожууннуң өнчүзүнче дамчытканнар. Байкалар чурттаар бажың, кажаа-хораадан аңгыда чунар-бажың, серилиг чайгы паштаныр чер, аңмаарны немей тудуп алганнар.

– Мал ажылынга черле сонуургалыг болгаш «Чаа сорук» төлевилелин чарлаптарга, улуг күзел-биле кириштивис. Бирги кыш хүр-менди эрткен. Бо кыжын каражалыг болдувус, каш баш инек хораан.

Өршээл болуп, кокай харын-даа өдекче кирбейн турар. Чоорту кажааны улгаттырар, машина тургузар чер болгаш бажың тудар дээш кылыр ажыл-ла хөй – деп, өгнүң эр ээзи ажыл-ижи болгаш сорулгалары-биле үлешти.

Байкаралар дөрт ажы-төлдүг. Өгнүң кыс ээзи саан үезинде уругларынга ак чемни кылып берип турар. Уруг уруу Томск хоорайда сургуул. Үш ожук дажы дег оолдары ада-иезиниң солуттунмас дузалакчылары. Олар тыва кижиниң чаңчылчаан ижинге чажындан тура өөренип өзүп турар.

Чуруктарны Шончалай Ховалыг тырттырган