Күрүне инспекторларының ээлчеглиг хыналдазы

Тываның дириг амытаннар делегейиниң объектилерин камгалаар күрүне комитединиң инспекторлары тайгада чайгы дыштанылга лагерьлеринче чедип, доктаамал рейдилерни чорудуп турарын комитет дыңнаткан.

Күрүне инспекторлары арга-арыг таңныылдары-биле кады «Таежный» болгаш «Шолбан-Ак» чайгы лагерьлеринде бок артынчыларын үе-шаанда үндүр сөөртүп турарын хынаар. Дириг амытаннар делегейиниң объектилерин камгалаар килдистиң даргазының оралакчызы Шолбан Сыдам-оолдуң дыңнадып турары-биле алырга, албан чери хыналда хемчеглерни ийи чыл улаштыр эрттирип турар.

– Тайга-сын девискээринде дыштанылга лагерьлеринде аъш-чем артынчыларын үе-шаанда үндүр сөөртүрү кол угланыышкыннарның бирээзи. Чүге дизе черлик дириг амытаннар аъш-чем артынчыларын «амзаар» дээш, лагерьниң девискээринче кирип болур. Уругларның дыштанылга черлериниң удуртукчуларынга сагындырыгны кылган. Бир эвес катап хыналда үезинде бок артынчылары демдеглеттинер болза, бижимел сагындырыгны бээр – деп, комитеттиң төлээзи чугаалаан.

Ол ышкаш күрүне инспекторлары лагерьниң удуртукчуларынга болгаш вожатыйларынга черлик дириг амытаннарга таварышканда, кичээниишкинниң хемчеглериниң база сагыыр дүрүмнериниң дугайында таныштырган.