Кызылда июль 6-га чедир болуп эртип турар «Күш-ажыл болгаш камгалалга белен бол» деп Бүгү Россияның күш-культура-спорт комплекизиниң фестивалының регионалдыг чадазы дооступ турарын ТР-ниң Өөредилге яамызы дыңнаткан.
ГТО фестивалы муниципалдыг чадаларның тиилекчилеринге болгаш призерларынга, а ол ышкаш маргылдааларга ГТО комплекизиниң тергиин мөңгүн демдээнге дүгжүп турар база оон-даа бедик түңнелдерлиг улуска аңгы-аңгы атлетика болгаш спорттуң хевирлеринге боттарының күжүн болгаш арга-мергежилин шенеп көөр арганы берип турар.
Фестивальдың программазында – 60, 1500, 2000 метр хемчээлге маңнаары, черге чыдып алгаш холун бүшкүедир болгаш хөндүрери, гимнастика сандайынга туруп алгаш мурнунче ийленири, узун хемчээлге шураары, пневматиктиг ланчыыдан адары, бөмбүктү октаары, эштири, а ол ышкаш оолдар болгаш элээди оолдарга бедик турникке өрү тырттынары.
Команда бүрүзүнде ийи оол, уруг ийи аңгы категорияда 12-13 хар биле 14-15 харлыглар боттарының спортчу белеткелин база чедиишкиннериниң деңнелин бедидери-биле киржип турар.
Фестивальдың бүгү-российжи чадазы Крымның «Артек» лагеринге сентябрь төнчүзүнден октябрь айның ортузунга чедир болуп эртер. Аңаа регион бүрүзүнден ГТО комплекизиниң шенелде нормативтерин тергиин алдын демдекке күүсеткен регионалдыг чаданың тиилекчилеринден тургустунган чыынды командалар киржир.
