Дөң-Терезин суурда ангар хевирниң спорт залында тудуг ажылдары уламчылап турарын Барыын-Хемчиктиң Олимпийжи курлавыр спорт школазы дыңнаткан.
Амгы үеде оран-саваның мурнуу талазын, иштики ханаларын бүрүнү-биле профнастил-биле шыпкан, эжиктертер болгаш соңгалар салдынган. Чылыдылга системазын эптээр талазы-биле ажылдар 50 хуу, электри удазыннарын чорудар база улаштыр чырыкты кожар ажылдар 10 хуу күүсеттинген.
«Тыва Республикада күш-культура болгаш спорттуң сайзыралы» күрүне программазының чорудуу-биле беш суурда (Бии-Хем кожууннуң Өөкте, Каа-Хем кожууннуң Кундустугда, Чөөн-Хемчик кожууннуң Шемиде, Бай-Тайга кожууннуң Хемчикте, Барыын-Хемчик кожууннуң Дөң-Терезинде) ангар хевирниң спорт залдарын тудуп турар.