Күзелдер шивизи: Чаа чылдың тоолчургу илби-шидизи

Кызылдың 9 дугаар гимназиязының немелде өөредилге төвүнде «Элээди журналист» бөлгүмнүң өөреникчилери бүдүн чуртта чарлаттынган «Күзелдер шивизи» акцияда идепкейлиг киржип турарын республиканың немелде өөредилге сайзырадыр төвү дыңнаткан.

Бөлгүмнүң кежигүннери Чаа чылдың бүдүүзүнде чүгле белек-селек алырын эвес, а делегейде бүгү чоннарга аас-кежиктиг амыдыралды, өөрүшкү-маңнайны күзеп турарлар.

– Чыл санында декабрь айда «Күзелдер шивизи» акцияны чарлап турар. Чаа чылдың бүдүүзү онзагай хуулгаазынныг үе деп бодаар мен. Ынчангаш кижилер Чаа чылды манаар, байырланчыг хөөн-биле уткуур.

«Күзелдер шивизи» акцияга киржип тургаш, мээң эң-не улуг күзелим – делегейге амыр-тайбың доктаап, шупту улус-чоннар аас-кежиктиг, өөрүшкү-маңнайлыг болуру. Ол ышкаш шупту аваларның арыннарынга өөрүшкү чайнап, уруг-дарыының аразынга аас-кежиктиг чурттаарын күзээр мен.

А бодумга хамаарыштыр хууда күзелим амдыызында чажыт. Күзелимни боттандырар дээш кызып өөренир апаар мен – деп, 9 «а» класстың өөреникчизи, элээди журналист Артыш Хомушку ачы-буян акциязының дугайында бодалы-биле үлешкен.