Алексей Дозурбай социал керээге үндезилээн күрүне деткимчезиниң ачызында күзелин амыдыралда боттандырган. Ол 2020 чылдың октябрь айда Туран хоорайга чурук студиязын ажыдып алган.
Аныяк сайгарлыкчы бичиизинден тура, чурук тырттырарынга ынак, ылаңгыя төрээн чериниң чараш бойдус-чурумалын. «Социал керээ» программазының акшаландырыышкыны-биле ноутбук, принтерлер, фотокамера, квадрокоптер дээш оон-даа өске чурук студиязынга херек дериг-херекселди садып алган.
Чурук студиязының ээзи “Өлчей” садыг төвүнде өрээлди хөлезилеп турар. Ооң чугаазы-биле алырга, чурук студиязында кээп турар бии-хемчилерниң саны эвээш эвес. Алексей Аржаан сумузунга чурттап турган. Кожуун төвүнче 2012 чылда көжүп келген. Ол мооң мурнунда Бии-Хем кожууннуң Өг-бүлеге болгаш уругларга социал дуза чедирер төпке одакчылап турган.
– Ук программа аныяк болгаш ажыл-херээн эгелээр деп турар сайгарлыкчыларга улуг идигни берип турар. Студияда документилерге чурук тырттырып, чаартып, уруглар сады болгаш школалар доозукчуларының альбомнарын, чагыг езугаар фотосессияны кылып турар мен. Ол ышкаш принтерге ак-кара, өңнүг чуруктар үндүртүр улус база кээр.
Квардокоптерни куда-дой үезинде ажыглаары көрдүнген. Коронавирус хамчыының уржуундан болгаш шеглел-кызыгаарлашкыннарны кииргени-биле, ук аппаратты ажыглаары болдунмайн турду – деп, Алексей Дозурбай ажылын таныштырган.
Өг-бүле дөрт ажы-төлдүг. Өгнүң каастакчызы ам узун шөлээде. Ол хөй хүлээлгелиг төпте ажылдап турар.
Алексей Дозурбай «Күзелдер шивизи» ачы-дуза акциязынга катчып, Аржаан сумузундан сес харлыг Айсланны деткип, хөй ажы-төлдүг өг-бүлеге фотосессияны белекке сөңнээн.
Чуруктарны Шончалай Ховалыг тырттырган
