Мөңгүн-Тайга кожууннуң С.Ч.Самбуу аттыг төп ном саңының библиотекарьлары байырлалдың дыштаныр хүннеринде Мугур-Бажы, Мозага, Барышкын, Кара-Өдек, Улаашкын, Изис дер черлерде кыштаглап турар малчыннарны эргий кезээн.
Төп ном саңының ажылдакчылары «Чаа чылдың хуулгаазын отчугаштары» деп библиоужуражылгаларны эрттирген. Көдээ ишчилер орус болгаш тыва дылдарга номнарны бижидип ап, номчаанын дужаап турган.
Кызыл-Хаяның көжүп чоруур ном саңы «Мөген-Бүрен» күрүнениӊ унитарлыг бүдүрүлгезиниң ажылдакчылары-биле Кужурлуг-Хову, Булук-Баары, Терек деп черлерде малын малдап турар көдээ ишчилерге «Соок-Ирейниң почтазын» чедирген. Олар ном, сеткүүлдерден аңгыда сумунуң эң чараш тураскаалдыг черлериниң бирээзи – Хиндиктиг-Хөлдү чураан календарьны база тывыскан.
Комплекстиг үнүүшкүннерниң кежигүннери кыштаглаашкын ниитизи-биле эки байдалда эртип турарын дыңнаткан.
