Каа-Хем кожууннуң шаңналы дээш хүрешке Мерген Монгуш шүүлген

«Сүбедей» спорт өргээзинге Каа-Хем кожууннуң шаңналы дээш шыырак аныяк болгаш улуг мөгелер аразынга тыва хүрешке маргылдаазы болуп эрткенин чагырга чери дыңнаткан. Чүс ажыг мөге шаңналдыг черлер дээш ачыр-дачыр тудушкан.

Шыырактарның шыырактары – Таңдының төлээзи, кожуун чергелиг Чаан мөге Мерген Монгуш шүүлген, Чөөн-Хемчиктиң төлээзи, чаа Арзылаң мөге Мөңге-Эртине Куулар үжүүрлешкен. Үшкү-дөрткү шаңналдыг черлерни Чаан мөге Сайын-Белек Түлүш, Хартыга мөге Начын-Мерген Ооржак үлешкеннер.

Тыва хүрешке кожууннар аразында көжүп чоруур маргылдааны февраль айда эрттирерин Барыын-Хемчик кожуун хүлээнип алган.
Сесче кирген мөгелер – Оттук Доржукай (Өвүр кожуун), Юрий Кызыл-оол (Каа-Хем кожуун), Күнденсонам Ондар (Сүт-Хөл кожуун), Мерген Иргит (Чөөн-Хемчик кожуун).

Сезен беш килге чедир деңзилиг шыырак мөгелер аразынга Хүлер Түлүш шүүлген. Үжүүрлешкен мɵге – Күдер Сат. Үш-дөртке Чимит Күжүгет биле Ценд-Аюш Монгуш артканнар.

Маргылдааның хүндүлүг аалчызы – ТР-ниң Дээди Хуралының Даргазы Кан-оол Даваа тиилекчилерге шаңналдар тыпсыр езулалга киришкен.

Каа-Хем кожууннуң чагырга чериниң даргазы Евгений Ооржак шилчип чоруур Кубокту Чөөн-Хемчик кожууннуң чагырга чериниң даргазы Алага Ондарга дамчыткан. Тыва хүреш маргылдаазын февраль айда эрттирерин чөөн-хемчикчилер хүлээнип алган.