Тываның найысылалындан ырак эвесте Кызыл кожууннуң төвү Каа-Хем суурда улуг спорт болгаш культура төвүнүң тудуун катап эгелээр. Республиканың Спорт яамызының удуртулгазы федералдыг бюджеттен ону акшаландырар акша-хөреңгини камгалап алган.
«Демография» национал төлевилелдиң «Спорт – чуртталганың чаңчылы» регион төлевилелиниң күүселдезинче ийи чыл иштинде 300 ажыг сая рубльди тускайлаанын спорт сайыдының оралакчызы Субудай Оюн дыңнаткан.
2023 чылда күш-культура болгаш спорт кичээлдеринге регион өнчүзүнде спортчу инфраструктура объектилерин тургузуп база эде чаартырынга 231 сая 617 муң рубль субсидия көрдүнген, ооң 229 млн. 300 муңун федералдыг бюджеттен база 2 сая 316 муңун республика бюджединден кады акшаландырар.
Субудай Оюннуң чугаазындан алырга, бо чылдың акша-хөреңгизин тудугнуң бодун доозарынче, а келир чылдыын – ынаар бүгү инженер четкизин кииреринче тускайлаар.
Ол ышкаш спорт болгаш культура төвүнге суг чыыр черни тударының айтырыы бо чылын шиитпирлеттинер. РФ-тиң Тудуг яамызы «Арыг суг» төлевилел-биле спортчу төптү долгандыр туттунуп турар «Преображенский» микрорайонну төпчүткен суг хандырылгазы-биле хандырарынче 528 сая 712 муң рубльди тускайлаан.
Спорт яамызы “кыраан” тудугну дүрген доозуп, спорт болгаш культура төвүн планнаан хуусаазында, тодаргайлаарга 2024 чылдың төнчүзүнде доозарынга ынанып турар. Тудугну доозарынга бо хүнде бир миллиард рубль херек.
Төлевилелди өөренип көрген тускай мергежилдиглер ону эвээжедир арга бар деп чүүлге келген, азы спорт болгаш культура объектизин долгандыр улуг чаагайжыдылгадан ойталаптар болза, төлевилел бюджедин элээн каш чүс сая рубльге кызырып, ооң дужаар үезин чоокшуладып ап болур.
Тывада онзагай объект – Каа-Хем суурга хөй талалыг ажыглаар улуг ареналыг спорт болгаш культура төвүн 2013 чылда тудуп эгелээнин сагындыраал. Эге дээрезинде төптүң кады акшаландырылга керээзи-биле тударын планнаан турган, ындыг болзажок, республикада экономиктиг берге байдал база боттуң акша-хөреңгизи чок болганы-биле, 2015-2017 чылдарда тудуг ажылдарын тургузупкан. Дараазында чылдарда объектини дужаары каш-даа катап соңгаарлаттынган.
РФ-тиң Чазааның айтыышкыны-биле, сөөлгү катап 2018 чылда тудугже эң хөй акша кирген, ынчан республика “Күш-культура болгаш спорттуң хөгжүлдези” күрүне программазындан 117 сая ажыг рубльди алган.
Эрткен чылдың төнчүзүнде, Тываның Спорт яамызының командазы «Демография» национал төлевилелдиң «Спорт – чуртталганың чаңчылы» регион төлевилелиниң хемчеглерин күүседиринче спортчу төптүң тудуун акшаландырарын камгалап алган. Спорт яамызы объектиниң тудуун ол программаның ачызында доозуптарынга идегеп турар.
Регионнуң спортчу инфраструктуразының хөгжүлдезинче федералдыг бюджеттен хаара туткан акшаландырыышкынның хемчээли 2023 чылда канчаар-даа аажок өскен, эрткен чылга деңнээрге ол дөрт катап хөй, азы 347,3 сая рубль болганын демдеглезе чогуур.
