Кызыл кожууннуң төвү Каа-Хем суурда төп ном саңынга Бүгү делегейниң театр база поэзия хүнүнге тураскааткан ужуражылга солун, уран чогаадыкчы байдалга болуп эрткенин Национал школа хөгжүдер институт дыңнаткан.
Кожууннуң хүндүткелдиг хоочуннары, Каа-Хем суурда Т.Б. Куулар аттыг 2 дугаар ортумак школаның башкылары болгаш өөреникчилери, шүлүк чогаалын сонуургап, бижип чоруур улус Тываның В. Көк-оол аттыг национал хөгжүм-шии театрының хоочун артистери Россияның алдарлыг, Тываның улустуң артистери Александр Салчак, Анзат Куулар, Тываның Улустуң артистери Дыртык Монгуш, Надежда Наксыл база уруглар чогаалчылары Тываның Улустуң чогаалчызы Чооду Кара-Күске, Россияның алдарлыг журнализи, “Башкы” сеткүүлдүң кол редактору Александр Шоюн олар-биле ужурашкан.
Ужуражылга ийи таланың билчиишкини-биле онзагай, кайгамчык эрткен. Солун чугаалары, ыры-шүлүк күүселделери-биле аалчылар чыылганнарны чалгааратпаан. Оларның сагыш-сеткилин чүглеп, хей-аъдын көдүрген. А киржикчилерниң талазындан сонуургаан айтырыглар, күүселде-дилеглер эвээш эвес болган. Ужуражылганы Кур-Чер суурнуң ном саңының эргелекчизи Роза Куулар башкарып эрттирген.
Күш-ажылдың хоочуну, “Россияның улус өөредилгезиниң тергини”, өөредилге шугумунуң адырынга хөй чылдарда ажылдап чораан, башкы-дагдыныкчы Өнермаа Ондар бодунуң хөрээн доюлдуруп чоруур бодалы – бичии чаштарның тыва дылын эки билип алыр талазы-биле кандыг хемчеглер херек кырында кылып чоруттунуп турарын сонуургаан.
Ол талазы-биле ажылдарны республиканың национал школа хөгжүдер институттуң ажылдакчылары кылып чорудуп, “Тыва дыл – чаштарга!” деп тускай регионалдыг төлевилел-биле ажылдап турарын институттуң ажылдакчызы А. Шоюн дыңнаткан.
Шүлүк бижииринге сонуургалдыг Каа-Хем суурда Т.Б.Куулар аттыг 2 дугаар ортумак школаның тыва дыл болгаш чогаал башкызы Айлаана Монгуш, төп ном саңының ажылдакчызы Буяна Кур база иштики херектер яамызының хоочуну Андрей Халбаажык олар боттарының бижээн шүлүктерин чыылганнарга номчуп күүсеткен.
