Эрзин кожууннуң чагырга чериниң даргазы Турген Сагды ырак-узак кызыгаар чоогу Качык сумузунда өөредилге албан черлериниң септелгезин хынап көргенин дыңнаткан.
– Качыкта хары угда ийи өөредилге албан черлеринде улуг хемчээлдиг септелге ажылдары чоруттунуп турар. Бо хүннерде школаның болгаш уруглар садының оран-саваларының кырын дуглаан материалын болгаш шалазын чаартып солаан.
Ук ажылдарны хемчээлиниң аайы-биле үндезин септелгеге деңнеп болур, чүге дизе бо ажылды боттандырарынга эвээш эвес түңнүг ашка-төгерик негеттинер. Дугуржулга езугаар «Эльбрусметалл-Литий» компания деткикчилеп, кылып турар.
Ажыл-чорудулганың иштинде Тастыг чыдынында литий казып тывар бүдүрүлгениң деткимчези-биле өске-даа ажылдар чоруттунуп турар. Чижээ Качыкче орукту кылбышаан, хем кежир көвүрүгнү септеп турар.
Чаа өөредилге чылында чаартынган школа болгаш уруглар сады бичии качыкчыларга улуг белек болуру билдингир. Ынчангаш Эрзин кожуун чагыргазының, Качык чонунуң мурнундан база амы-хуумдан «Эльбрусметалл-Литий» компания чиңгине директору Евгений Балуковка четтиргенимни илеретпишаан, кайы-даа талага үре-түңнелдиг ажыл-ишти, чедиишкинни күзедим.