Кады ажылдажылганың чаартынган планын бадылаан

Тыва Республиканың Чазаа биле Кыдат Улус Республиканың Синьцзян-Уйгур автономнуг можузунуң Чазааның аразында дугуржулга хемчеглерин боттандырар планны видеоконференцхарылзаазының үезинде ийи тала бадылаан.

Тываның күрүне кызыгаары таварты автомобиль база агаар эрттирилге пунктуларын эде чаартыптарга, Синьцзянь-Уйгур автономнуг можу-биле кады ажылдажылга Тывага чаа аргаларны ажыдар деп, Тываның Баштыңы Владислав Ховалыг тайылбырлаан.

2019 чылда-ла Тываның Чазаа биле Кыдат Улус Республиканың Синьцзян-Уйгур автономнуг можузунуң Чазааның аразында дугуржулгага аттар салдынган, ынчалза-даа билдингир чылдаганнаар-биле дугуржулга амыдыралга боттанып четтикпээн. Кыдаттың эрге-чагыргазы кошкадыышкын политиказын кииргениниң ачызында, бо ужуражылганы эрттирген.

Тываның Баштыңы Владислав Ховалыг, Чазак даргазының оралакчызы албан-хүлээлгени күүседип турар Владимир Донских, орук-транспорт комплекизиниң сайыды Шораан Чыргал-оол, ТР-ниң туризм агентилелиниң директору Ай-Хаан Догур-оол база Кызылдың мэри Карим Сагаан-оолдуң киришкени ужуражылга үезинде, ийи тала харылзааларны уламчылаарынга беленин дыңнадып, кады ажылдажылганың чаартынган планын бадылааннар.

Садыг-экономика, эртем-техника болгаш культура адырларында хемчеглер кирген пландан аңгыда, Кызыл хоорай биле Кыдат Улус Республиканың Синьцзян-Уйгур автономнуг можузунуң Алтай округунуң аразында найыралдыг харылзааларны тургузар дугайында протоколга атты ужуражылга үезинде салган.

Кыдаттың Синьцзян-Уйгур можузунуң эрге-чагыргазы-биле дугуржулганы боттандырар дээш, тыва тала бүгү күжениишкиннерни салыр деп, Владислав Ховалыг бодунуң блогунда бижээн.