«Кадык амыдыралче орук» төлевилелдиң эмчилери Тере-Хөл кожууннуң чурттакчыларын шинчээн

«Кадык амыдыралче орук» төлевилелиниң эмчилер бригадазы ыраккы Тере-Хөл кожуунга сентябрь 8-тен 10-га чедир үш хонук ажылдаан.

Тываның Баштыңының Дээди Хуралга Айыткалының үезинде айыткан даалгалары езугаар 2025 чылда төлевилелди боттандырып эгелээн. Сорулгазы – көдээ черлер чурттакчыларының аарыгларын эртежик илередип, эмнеп, катап тургузарын деткиири.

Төлевилел боттандырыышкынын чорудуп турар Хөй-ниитиниң кадыкшыл төвү Тере-Хөл кожуунда тускай мергежилдиг эмчилер чеде бергенин дыңнаткан. Кожууннуң чурттакчы чону көжүп чоруур комплексте ЭГДС база маммография аппараттарынга шинчилелдерни эрткен. Көжүп чоруур бригаданың бирги ажыл хүнүнде 40 кижи комплекстиг шинчилгелерни эрткен.

Тываның Баштыңы [id360104045|Владислав Ховалыг] республиканың бүгү чурттакчы чонунга профилактиктиг хыналдаларны чорударын Тываның Кадык камгалал яамызынга даасканын сагындыраал. Эмчилерге дуза кылдыр «Кадык амыдыралче орук» база «Уругнуң кадыкшылынче орук» төлевилелдери-биле немелде хемчеглерни организастаан.

Владислав Ховалыг тус черниң чурттакчыларын шинчилгелерже хөйү-биле хаара тударын, ылаңгыя шимчей албас болгаш назылап кыраан улусче онза кичээнгейни угландырарын кожуун чагырга даргаларындан негээн.

2025 чылда эмчилер «Кадык амыдыралче орук» төлевилели-биле республиканың 13 кожуунунче 50 үнүүшкүннү кылган. Чоннуң кадыкшыл байдалынга демдекти салып, аарыгларны эге чадазында илередир сорулга-биле 12533 эмчи шинчилгезин чоруткан.