ТР-ниң Кадык камгалал яамызы дүрген дуза чедирер албан черин төпчүткенин дыңнаткан. Россия Федерациязының Кадык камгалал яамызының сүмелээни езугаар бо хемчегни медицина албанының ажылының шынарын экижидеринче угландыр чоруткан.
Орук шимчээшкининиң айыыл чок чоруун бедидер болгаш орук-транспорт озал-ондаандан чок болур таварылгаларны эвээжедир дээн Тываның Баштыңы Владислав Ховалыгның саналдааны комплекстиг хемчеглер регионнуң чугула хереглелинге дүгжүп база аңаа салдарны чедирер ужурлуг.
Тываның эрге-чагыргазы Онза байдалдар яамызы-биле кады чурттакчылыг черлерде болгаш ыракта орук участоктарында онза байдалдарже дүрген үнүптер аварийлиг-камгалал кезектерин немей тургузарын көрүп турарын сагындыраал.
Дүрген эмчи дузазын чедирер албан чериниң төпчүткен эргелели айыыл-халап болган черже эң чоокку бригаданы чорудар деп, Кадык камгалал яамызы тайылбырлаан. Бир эвес орук озал-ондаа болган таварылгада, кожа-хелбээ кожууннуң бригадазы тус черниинден чоокта болза, ону айыыл-халап болган черже чорудуптар.
«Кыйгыртыгларны төпчүткен арга-биле хүлээп алыры дүрген дуза херек кижиниң байдалының аар-бергезин эң-не дүрген үнелээр ийикпе, азы болза Төп диспетчер пультузунда дежурный эмчи дүрген дуза бригадазынга онлайн-харылзаа таварыштыр айтыышкыннарны берип, эмчиниң баары албан эвес аарыг кижилерге консультацияны берип болур» – деп, Кадык камгалал яамызы тайылбырлаан.
Аарыг кижини кожуун эмнелгезинге чыттырбайн, тускай медицина организациязынче, ооң иштинде авиация-биле чедирер дугайында шиитпирни, байдалды ырактан хынаан соонда, шиитпирлеп болур. Ылаңгыя онза байдалдарда ол чугула.
Төпчүткен эргелел эмчи организациялары-биле дарый харылзаажып, дүрген дуза бригадазының чедип келириниң болгаш аарыг кижиниң байдалының дугайында медээни дораан дыңнадыптар. Республикада шупту кыйгыртыглар чаңгыс аай медээлер дөзүнге турар болгаш, онлайн таварыштыр көрүп болур. Долгаашкыннарны 103 дугаарлыг бөдүүн дугаарлыг автоматчыткан хөй каналдыг система таварыштыр хүлээп ап турар.
Аарыг кижиниң байдалын көрүп, чоокку эмнелгелерниң соңгаарлатпас дуза албан черлерин, ооң иштинде фельдшер-акушер пунктуларын ажылдадып болур. Хөй кижи когараан онза байдалдарда чоокку эмнелге албан черинге түр үениң стационарлыг дүрген дуза пунктуларын организастап база болур.
Бүгү чуртта төпчүткен диспетчер албан черлери үстүнден удуртур принцип-биле ажылдаар. Ындыг болзажок, дүрген дуза машиналарының кээр үезиниң нормативтери өскерилге чок арткан деп, Тываның Кадык камгалал яамызы демдеглээн.