“Кадык камгалалы” национал төлевилелдиң Сибирьде боттаныышкынын сайгарып чугаалашкан

Сибирь федералдыг округтуң бүрүн эргелиг төлээзиниң оралакчызы Вадим Головконуң удуртулгазы-биле эрткен хуралда «Кадык камгалалы» национал төлевилелдиң регионнарда боттаныышкынын чугаалашкан. Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышевтиң даалгазы-биле хуралды эрттирген.

Округда «Кадык камгалалы» төлевилел боттанып эгелээнден 220 ажыг эмнелге албан черлерин тудуп, 370 оран-саваны септээн, 4000 санныг дериг-херекселдерни база дүрген дузаның 860 автомашиналарын саткан, 400 хире модульдуг тудугларны эптеп тургусканын Вадим Головка демдеглээн.

– Амыдырал-чуртталганың шынарынга кадыкшыл улуг рольду ойнаар, ынчангаш чурттакчылар бедик деңнелдиг медицина албан черлерин ам-даа тударын, оларның чөптүг ажыглалын манап турарлар. Беш чылда санаан төлевилелдер бо чылын доостур, чыл төнчүзүнге чедир, хуусаазын соңгаарлатпайн шупту хемчеглерни доозар херек – деп, бүрүн эргелиг төлээзиниң оралакчызы чугаалаан.

Вадим Головко ажылдары доозулбаан объект бүрүзүнге хүн бүрүнүң шыңгыы хыналдазын хандырарын чагаан. Ол ышкаш төлевилел кылыкчыларын база тудугжулар шилилдезин шыңгыырадып, арга-дуржулганы база чаңгыс аай төлевилелдерни ажыглаарын чугаалаан.

Диспансеризацияже болгаш профилактиктиг шинчилгелерже чурттакчы чонну хаара тударын көвүдедир, мобильдиг комплекстерни ажыглаар.

Мурнады боттандырар айтырыгларның бирээзи – бо чылдың төнчүзүнге чедир шупту керээлерни чарып доозар херек деп, оралакчы дарга сагындырган.

Хуралга Россияның кадык камгалал хайгааралының удуртукчузу Алла Самойлова, Кадык камгалал яамызының төлевилел департаментизиниң директору Михаил Дьяченко, регионнарның эрге-чагырга органнарының адырлар удуртукчулары, кол федералдыг инспекторлар база Чиңгине прокуратураның төлээлери киришкен.