«Кадык камгалалы» национал төлевилелдиң, кадык камгалалының эгеки чаданың чаартылгазы программазының чорудуу-биле көдээ черлерде 20 медицина объектизин чартканын ТР-ниң кадык камгалал сайыды Анатолий Югай дыңнаткан.
– Тывада сес фельдшер-акушер пунктузун болгаш дөрт эмчи амбулаториязын чаарткан, ол ышкаш сес объектини үндезини-биле септээн.
Чыл эгезинде Чөөн-Хемчик кожууннуң Баян-Талада болгаш Бии-Хем кожууннуң Хүтте фельдшер-акушерских пунктуларын, сентябрьда Каа-Хем кожууннуң төп эмнелгезиниң уруглар салбырын, октябрьда Сукпак суурда эмчи амбулаториязы ажыттынган.
«2018-2025 чылдарда кадык камгалалының хөгжүлдези» регион программазы-биле акша-хөреңги база көрдүнген. Ук программаның чорудуу-биле бо чылын Бии-Хемниң төп кожуун эмнелгезиниң поликлиниказының оран-савазның соңгалар болгаш эжиктерин үндезини-биле септеп, ийи котелду тургускан. Ол ышкаш психиатрия эмнелгезин херимнеп, оран-саваже кирер черин, Тес-Хем кожууннуң төп эмнелгезиниң чылыг трассазын, Таңдының төп эмнелгезиниң чылыг четкилерин болгаш суг дамчыдылгазын үндезини-биле септээн.
Республиканың бир дугаар эмнелгезиниң даштыкы чылыг трассазының тудуу чоруп турар. Республика бюджединден ук программаның боттандырылгазынче ниитизи-биле 24 860,00 сая рубль көрдүнген.