«Ада-чурт камгалакчылары» күрүне фондузунуң регионалдыг салбырынга тускай шериг операциязының хоочуннары шеверлер болгаш даараныкчылар-биле ужурашкан.
Күрүне фондузунуң төлээлери делегей чергелиг «Чалгыннарда» деп тускай хеп мөөрейиниң дугайында таныштырып, дайынчыларга берип турар идик-хепти делгээн.
Кадыкшылының байдалы-биле харык-шинээ кызыгаарлыг улуска хүн-бүрүде кедер эптиг хеп негеттинип турар. Тускай шериг операциязынга киришкеш, бертик-межел арткан база коляскалыг дайынчыларга база тускай хеп хереги билдингир.
Эрткен чылдан тура күрүне фондузу дайынчыларга хеп түүн берип эгелээн. Ында иштики хептен эгелээш чылдың кайы-даа үезинде кедер даштыкы хеп бар.
Госпитальдарда эмнедип, аппараттарга коштурган дайынчыларга иштики хепти кедирери безин дыка берге. Амгы үеде оларга эптиг болгаш шынарлыг хепти даарап турар. Чүвүрлерниң кыдыгларын, футболка, костюм… курткаларның чеңнерин чежип ап болур.
Кылымал хол, бут кедер улуска хеп кедери база нарын.
Тускай шериг операциязының хоочуннары Вадим Кара-оол биле Шораан Ооржак хеп алганнарның аразында. Олар хепти кижи бүрүзүнге таарымчалыг кылдыр даараары күзенчиг дээрзин демдеглээн. Чүге дизе, кээп турар хепти чаңгыс аай стандарттар-биле дараан.
«Кадыкшылының байдалы-биле харык-шинээ кызыгаарлыг улуг-биче улуска, камгалакчы оолдарга хүн-бүрүде кедер, ажылдаар, культура-спортчу хемчеглерге тускай эптиг хеп херек. Даараныкчылар оларже кичээнгейни салып, чогаадыкчы чоруун көргүзүп, социал төлевилелге киржир болза эки. Фондунуң талазындан шеверлерни мөөрейге киржиринче кыйгырып, соцчеткилерге чарлап, ажылды чорудар бис» – деп, Тываның Сайгарлыкчы чорукту деткиир фондунуң Улусчу уран ус-шеверлел төвүнүң удуртукчузу Чодуура Каң-оолдуң чугаалаан.
Регионалдыг чаданы эрткен мөөрейжилер боттарының коллекцияларын июнь айда, Красноярск хоорайга округ чадазынга, Сибирь федералдыг округтуң «Ада-чурт камгалакчызының кубогу» маргылдаазының үезинде таныштырар.
Тываның политехниктиг техникумунуң бирги курсчузу Веста Хомушку мөөрейни сонуургап, аңаа бөлүү-биле киржирин дыңнаткан. Сургуул келир үеде даараныр черни ажыдып алгаш, кадыкшылының байдалы-биле харык-шинээ кызыгаарлыг улусту деткип, оларга тускай хепти даараар бодалдыг.
Күрүне фондузу регион бүрүзүнге идик-хеп бүдүрер бүдүрүлгелер ажыттынарын чедип алыр дээш, төлевилелди ам-даа сайзырадыр сорулгалыг. Ынчан ыраккы чурттакчылыг черлерден дайынчы хөделиишкиннер хоочуннары боттарынга эптиг хепти чагыдып база садып алыр аргалыг болур.
«Ада-чурт камгалакчылары» күрүне фондузу «Чалгыннарда» деп тускай хеп мөөрейин эрттирип турар. Чагыгларны май 15-ке чедир хүлээр. Тодаргайы-биле 👉 on-wings.ru