Какпактаан сарлык эъди, хеңме, шиме

Көдээ ажыл-агый кооперативтериниң бирги республика шуулганынга Мөңгүн-Тайга кожуундан «Арзайты» көдээ ажыл-агыйының хереглел кооперативи бүдүрген аъш-чемин бараалгатканын Тываның Көдээ ажыл-агый яамызы дыңнадып турар. Аңаа суурларда биче ажыл-агыйларның турум хөгжүлдезин магадылаар көдээ ажыл-агый кооперациязынга хамаарышкан айтырыгларны сайгарарып чугаалашкан.

Мөңгүн-тайгажылар баартактарында соокка кургаткан болгаш какпактаан сарлык эъди, хеңме, кара кадык, сарлык шимези дээш оон-даа өске бүдүрген барааннарын делгээн.

Тываның Көдээ ажыл-агый болгаш аъш-чем сайыды Сергей Ондар «Арзайты» кооперативин республиканың көдээ ажыл-агыйының хөгжүлдезинче киирген үлүг-хуузу база бүдүрүлгениң чедип алган бедик көргүзүглери дээш шаңнап-мактаан.

Сайыт күрүне агробизнести улгаттырарынче сонуургалдыг дээрзин айыткан. «Көдээ ажыл-агый кооперациязы – суурда көдээ ажыл-агыйны хөгжүдүп сайзырадырынче, даштыкы барааннарны солуурунуң айтырыгларын шиитпирлээринче, көдээ черге амыдырап-чурттаарының чогуур деңнелин хандырарынче аграр политиканың мурнады хөгжүдер угланыышкыны» деп, Сергей Ондар демдеглээн.