Улуг-Хем кожуун чагыргазының административтиг комиссиязының харыысалгалыг секретары Шолбана Амаш, көдээ ажыл-агый эргелелиниң кол зоотехниги Урана Монгуш Ийи-Тал, Хайыракан девискээринде чазаглыг орук кыдыында туттунган кыштагларның ээлери-биле ужуражып, тайылбыр ажылын чорутканын чагырга чери дыңнаткан.
Ийи-Талдың Чеди-Саң, Барык, Куу-Даг, Салдам, Улуг-Хая, Хайыраканның Улуг-Хая баары, Ээр-Хавак, Сарыг-Достак, Эрги-Суур, Куржааңгы баары, Кыйыг деп черлерде кыштагларның ээлери-биле ужуражып, малын кадарып, караңгы үеде малын кажаалап, кадат чок мал дээш торгаалга онаап болурун дыңнатпышаан, караңгыда чырып көстүп келир кожааларны үлээн.
Кежээки үеде орук озал-ондактарның хөй кезии мал-маганның киржилгези-биле болуп турар. Ооң бир чижээ, чоокта чаа Ийи-Тал – Хайыракан аразынга болган орук озал-ондаанга үш кижи амы-тынындан чарылган.
Көдээ ишчилер малын кадат чок арттырганындан, чолаачылар дүрген халдып, орук демдектерин сагывайн турарындан айыылды тургузуп турар.
Малчыннар караңгылаваанда малын сүрүп ап турарын дыңнаткан. Чамдыктары чолаачыларны буруудадып турар. Оруктар кыдыында мал-маган чураан, чолаачыларга дүргенин эвээжедир демдектерни тургускан-даа болза, чолаачылар база хөлүн эртир дүрген халдыр апарган. Ынчалза-даа, кадат-хайгаарал чок дээш, чүгле караңгы үеде эвес, дүн-хүн чок малын кадарып, хайгаараары көдээ ишчиниң харыысалгазында.