Кара-хөлчүлер малчын аалдарже орукту дескилээн

Бай-Тайга кожууннуң Кара-Хөл сумузунуң чурттакчылары үш хонуктуң дургузунда малчын аалдарже аргыжар Берт-Боом оруун аштап арыглаар болгаш дескилээр ажылдарын боттарының күжү-биле демнежип кылганын чагырга чери дыңнаткан.

Ук орук сумунуң хөлде чурттап чоруур малчын аалдарынче баар кол оруу болганда, чон идекпейлии-биле киришкен. Херээжен улус ажылданган эр чонну изиг чем-биле чемгерген, а олар хууда чүък сөөртүр машина-техниказын, тракторларын ажылдадып тургаш, ажылды чедимчелиг доосканнар.

Аныяк-өскенге арга-сүмезин берип, кады демнешкен хоочуннар Григорий Буянзаковичиге, Байвек Хулер-ооловичиге, Жора Ивановичиге, Василий Окаановичиге, Чечен-оол Александровичиге, Шолбан Хертековичиге сумунуң удуртулгазы четтиргенин илереткен.