Тываның Улустуң чогаалчы, Кызылдың хүндүлүг чурттакчызы, хоочун журналист Кара-Күске Күнзекович Чооду ооң мурнунда частың болгаш күш-ажылдың байырлалын канчаар эрттирип турганын сактып чугаалаан. Өгбе чогаалчы каш хонгаш мугур 90 харлаар.
– Шаанда Май 1 байырлалын канчаар эрттирип турганын сактып олурдум. Мооң мурнунда 1940-1950 чылдарда аъттарлыг, тевелерлиг чыскаал эртип турган. 1960 чылдарда мөге салып турган улустарны сактып тур мен. Арат шөлүнге асфальт чок турар шагда, 1954 чылда, парк аксындан эгелээш, көвүрүгге четкеш, дедир маңаа кээп маңнажып турдувус. Ол үеде тускай кедип алыр идик-даа чок, кым кандыг идиктиг болурул, сапоктуг-даа маңнажып турган бис.
Чыскаалга чадаг-тергелиг-даа, мотоциклдиг-даа улус киржип турган. Салчак Тока дарга Дээди Хуралдың балконунга үнүп келгеш, чыылганнарга байыр чедирер чүве. Эртен эрте улус чыглып кээр, 8-9 шак үезинде кудумчуларны дуглаптар турган. Организация бүрүзү шупту ыяап-ла киржир. Ынчангаш улус төп кудумчуларга сыңышпайн баар.
Байырлыг чыскаал соонда лозунгуларны, баштыңнарның чуруктарын ажылдаар черге хүлээдип берипкеш, улаштыр байырлаар турдувус.
Тайбың! Күш-ажыл! Май! Байырлал-биле!