Мөңгүн-Тайга кожуунда Каргы сумузу 100 чыл оюнга тураскааткан байырлал хемчеглерин эрттирген. Тываның Баштыңы Владислав Ховалыг сумунуң чурттакчыларынга бо онзагай хүнү-биле байырны чедирген.
Ийи хонук дургузунда байырлалдың аңгы-аңгы культурлуг болгаш спортчу хемчеглери эрткен. «Таарымчалыг хоорай хүрээлелин тургузары» федералдыг төлевилел езугаар чаагайжыткан «Найыралдың начыны» стадионун байырлыы-биле ажыткан.
Каргының юбилейинге тураскааткан байырлыг хурал болгаш байырлал концерти Культура болгаш дыштанылга төвүнге болуп эрткен. Бо юбилей төрээн сумузунуң төөгүзүн, чаңчылдарын тургузуп, алдаржыткан кижилерге мөгейиг кылдыр эрттирип турарын Мөңгүн-Тайга кожуун чагыргазының удуртулгазы онзалап демдеглээн. Байырлал бүдүүзүнде кижизидилге болгаш өөредилге, спорт, саң-хөө, культура болгаш кадык камгалал дээн ышкаш, аңгы-аңгы адырларда шылгараан ажылдакчыларны демдеглээн.
Тыва оюннарга спортчу маргылдаалар – Доора-Хову деп черде аът чарыжы база чаарттынган стадионга тыва хүреш маргылдаазы болган. Оон аңгыда эр, херээжен улус аразынга «хой көдүреринге» мөөрей, республика чергелиг хол бөмбүүнүң маргылдаазы эрткен.
Байырлалдың онзагай болуушкуну – Каргы кожууннуң 100 чылдаанынга тураскааткан байырлыг чыскаалга база концертке Тыва национал оркестрниң киришкени.
ТР-ниң национал хүреш федерациязының "Алдын содак-шудак" телевилелиниң шыырак мөгелер аразынга саннар ажылдап алыр хуреш маргылдаазынга Чаан мөге Айдын Монгуш шүүлген.
Сумунуң аныяктары ТР-ниң Аныяктар херектериниң талазы-биле яамының төлээлери база ат-сураглыг аныяк лидерлер-биле ужурашкан. Байырлал кожууннуң аныяк артистериниң диско-концерти-биле доозулган.
