Улусчу чогаадылга бажыңынга эрткен «Бүгү чүүлдү тиилелгеже!» Улусчу полктуң эки турачылар шуулганының база бир киржикчилери – «Салгын» шимчээшкининиң «Идегел» эки турачылар ротазының кежигүннери.
Каа-Хем кожууннуң эки турачыларының өскелерден ылгалы – бичии чук саваларда хандыларны тыва дайынчыларга белеткеп берип турары.
«Идегел» эки турачылар ротазының даргазы Айлана Даваа ажыл-ижин таныштырган.
– Каа-Хем кожууннуң Дерзиг-Аксы суурунда «Идегел» эки турачылар ротазын 2-3 чыл иштинде удуртуп турар мен. 55-ки мото-адыгжы бригаданың дайынчыларынга ачы-дузаны чыып турар бис. Ажылывыстың кол угланыышкыны – акша-төгерикти чыггаш, болгарка, хирээ дээн ышкаш херекселдерни саткаш, чедирери. Оон аңгыда идик-хеп, суксуннар, аъш-чем, чажырттынар четкилерни белеткеп тур бис.
Янзы-бүрү каттардан хандыларны, чигирлээн божадан суксунну дайынчы оолдарывыска белеткеп берип турар бис. Эң ылаңгыя божадан кылган суксунну шериг оолдарывыс дыка сонуургаар, үргүлчү чагып турар. Тыва чоннуң национал ак чеминиң бир шынары – белен аштатпас. Оон аңгыда чойган карты, киш-кулаадан хандылар кадыкшылга эки. Кыжын доңургаш-даа чорудуп болур.