Чеди-Хөл кожууннуң Оюн Корода аттыг төп үлегер-майыктың ном саңынга шүлүкчү, прозачы, чогаалчы Октябрь Туң-оолдуң 80 хар оюнга тураскааткан “Кавай черим” деп кожуун чергелиг шүлүкчүлер аразынга батл-мөөрей болуп эрткенин ном саңы дыңнаткан.
Тываның болгаш Россиянын чогаалчылар эвилелиниң кежигүнү Октябрь Кыргысовичиниң сеткил-сагыжының хээлери, тыва чонунга сөңнээн шүлүктериниң каас-чаражын, онзагайын көрүкчүлерге аянныг шээжи-биле таныштырып келген киржикчилерниң саны хөй болган. Тыва шүлүк чогаалының шын-на тергиин мөгейикчилери чыглып келген.
Мөөрейге “Чеченнер”, Тиилекчилер-1”, “Тиилекчилер-2”, “Хек-даваннар”, “Күзел”, “Сылдыстар” болгаш “Эртинелер” деп Чеди-Хөлдун сумуларындан чеди бөлүк киришкен.
Киржикчилер чогаалчының колдуунда философчу болгаш төрээн чер дугайында темаларын чырыткан шүлүктери-биле бараалгааннар.
Элегес сумузунуң өөреникчилери “Кырган дыт дугайында балладаны” аянныг гитара хөгжүмү-биле үдеп күүсеткени тергиин болган. Өөреникчилерни Элегес школазының тыва дыл, чогаал башкызы Оксана Тюлюш база школаның библиотекарь башкызы Лиана Долзат белеткээннер.
Хову-Аксы школазының 9-ку класстың өөреникчилериниң шээжилээн шүлүктери, көрүкчүлерниң ханы сеткил-сагыжынче кирип, куюмнадыпканы каракка илдең болган. Өөреникчилерни тыва дыл болгаш чогаал башкызы Долчаң Кунгаа белеткээн. Бо башкының тыва дылынга ынаа, ажылынга бердингени өөреникчилериниң тергиин белеткенгенинден көскү.
Дараазында өөреникчилер аразында эң чаптанчыг, хамык улусту кайгадыр шүлүктептер чаштар Чал-Кежиг сумузунуң өөреникчилери болган. Олар чогаалчының бичии уругларга тураскааткан “Анайым”, “Аякта варенье”, “Эжим” деп шүлүктерин номчааннар.
Хендерге сумузунуң өөреникчилериниң хей-аъдын киирер башкылар – Анай-Хаак Донгак, Сайлаң Эртине база хоочун башкы Ольга Лайзап, библиотекарь Роланда Сотпа.
Төпчүткен ном саңының сумуларында ажылдап турар ном саңнарының ажылын демдеглеп каары артык эвес. Олар кожуун төвүнге эрттип турар конференциялар, мөөрейлер, чогаалчылар-биле ужуражылгаларның идепкейлиг киржикчилери.
Башкылар, өөреникчилер, чогаалчылар, библиотекарьлар аразында сырый харылзаалыг ажыл-чорудулга эки чоруп турар-ла болза, тыва дылывысты кадагалап, камгалап шыдаптарын ном саңының ажылдакчылары санап турар.
Мөөрейниң түңнелдери-биле 8-9 класстар аразында бирги черге “Чеченнер” бөлүү, 10-11 класстар аразынга “Тиилекчилер-1” бөлүү, 18 хардан өрү назы-харлыглар аразынга “Хек-даваннар” бөлүү төлептиг болган.
Арткан бөлүктер “Төрээн дылынга хүндүткел болгаш хандыкшыл” деп номинациялар чаалап алганнар.
Тыва чечен чогаал кандыг-даа үеде кижилерниң сагыш-сеткилин уран сөстүң күжү-биле оттуруптар болгаш ниитилел амыдыралында кезээде бирги черни ээлеп турар.
