Бүгү делегейниң уруглар камгалалының хүнүнде Национал школа хөгжүдер институттуң ажылдакчылары Алдан-Маадыр аттыг Национал музейниң чанында өгге ада-иелери-биле аалдап келген уругларга тыва улустуң оюннарын ойнатканын институт медеглээн.
Уруглар ада-иелери-биле чижип, кажыктың аът чарыштырар хевирин идепкейлиг киришкеннер.
Сөөлгү үеде ажы-төлдүң, ада-иелерниң-даа тыва оюннарга сонуургалы оттуп турары ɵɵрүнчүг. Чүгле тыва уруглар эвес, а орус омактыг адашкылар база кажыктың аът чарыштырар хевирин сонуургап ойнааннар.
“Өгге кирген кижи аяк эрии ызырар” дээр болгай, ажылдакчылар өгнүң улуг-биче аалчыларынга чигирзиг белектерни сөңнээн. Хемчегге ниитизи-биле 37 оол биле уруг кээп киришкен.
База бир демдеглексенчиг чүүл чүл дизе Улусчу фронтунуң аныяк идепкейжилери кажык оюнун улуг сонуургал-биле ойнап, идепкейин көргүскен.