Национал школа хөгжүдер институттуң ажылдакчылары Тываның күрүне университединиң “Арбай-Хоор” деп чайгы школазынче үнүүшкүннү кылып, четкенин институт дыңнаткан.
Өөредилгениң этнопедагогиктиг талазын сайзырадыр лабораторияның ажылдакчызы Азиана Саая оолдар болгаш уругларга тыва улустуң оюннарыныӊ хевирлериниӊ дугайында тайылбырны кылып, уруглар-биле кажык оюнунуң «Аът чарыштырар» хевирин ойнааннар. Уруглар кажык оюнунуӊ ук хевирин катап-катап аразында мөөрейлежип, улуг сонуургал-биле ойнап турганнар.
Оон аӊгыда демдеглексенчиг чүүл чайгы школада уругларның тыва дылын сайзырадыры-биле педагогика институдунуң тыва дыл башкылары шүлүктерни өөредип, тыва улустуң оюннарыныӊ хевирлерин ойнадып, тыва ырларны ырладып турарын эскерип болур. Чайгы школада дыштанып турар уруглар тыва дыл кырында чугаалажып турары өөрүнчүг.