Келир үе – бистиң холувуста: Тываның Баштыңы чаңгыс аай бадылаашкын хүнүнге киришкен

Тываның БаштыңыВладислав Ховалыг Каа-Хем хоорай хевирлиг чурттакчылыг черде Солаан Базыр-оол аттыг культура бажыңында, 90 дугаар соңгулда участогунга соңгуп четкен.

Владислав Ховалыг үнүн бээр дээш, өөнүң ишти база уйнуу-биле келген. Республикада 187 соңгулда участоктары эртенгиниң 8.00 шакта ажыттынган. Тыва Республиканың Төп соңгулда комиссиязының дыңнатканы-биле алырга, шупту соңгулда участоктары ажыттынганындан бээр соңгукчуларның идепкейлиг киржилгези демдеглеттинген.

Тываның Баштыңы бодунуң соңгаанын журналистер-биле интервьюга чугаалап тура, бөгүн чүгле мандаттарның салым-чолу эвес, а Россияның келир үези шиитпирлеттинер деп демдеглээн: «Күчү-күштүг Россия дээш үнүм бердим. Сайзырап, туттунуп, бурунгаар көрген Тыва дээш, эртенги хүнге бүзүрел дээш үнүм бердим» – деп, Владислав Ховалыг чугаалаан

Владислав Ховалыг республика чуртта эң-не идепкейлиг, хамааты харыысалганың бедик деңнелин көргүзүп турар регионнарның санынче база катап киреринге идегелин илереткен болгаш, боттарының үнүн бээринче чаңгыс чер чурттугларын кыйгырган: «Келир үе – бистиң холувуста» – деп, Владислав Ховалыг демдеглээн.

Сентябрьның 18, 19, 20 хүннеринде Тывага чаңгыс аай бадылаашкын хүнү болуп эртерин сагындыраал. Бо хүннерде Тывага Күрүне Думазының соңгулдаларындан эгелээш, тус черниң төлээлекчилер органнарының соңгулдаларынга чедир 11 соңгулда кампаниязы эртер.

Үш хүннүң дургузунда соңгукчулар Россия Федерациязының Федералдыг Хуралының Күрүне Думазының тоску чыыжының депутаттары, Тыва Республиканың Баштыңы, Дээди Хуралдың Сүт-Хөлдүң чаңгыс мандаттыг 10 дугаар соңгулда округунуң депутады база муниципалдыг тургузугларның төлээлекчилер хуралдарының 61 депутады дээш бадылаарлар.

Соңгукчулар киир бижиткен чериниң аайы-биле, сентябрьның 18, 19, 20 хүннеринде эртенгиниң 8.00 шактан кежээкиниң 20 шакка чедир соңгулда участоктарынга соңгуур.

Хамаатыларга эптиг болзун дээш, чаңчыл езугаар соңгулда комиссияларынга чеде бергеш, азы бажыңынга соңгуур аргаларны берген.