Өвүр кожууннуң чагыргазынга Тывада болгаш республикадан дашкаар өөренип турар студентилер болгаш чаа дооскан аныяк кадрлар-биле ужуражылга болуп эрткенин чагырга чери дыңнаткан.
Чагырга даргазының социал политика талазы-биле оралакчызы Чодураа Шойдан аныяктарга байыр чедирип, кожууннуң сайзыралын, амыдыралда боттанып турар төлевилелдерни, келир үеде салдынган сорулгаларны таныштырган. Ооң чугаазы-биле алырга, кожуунда 18 хардан 35 хар аразында 2027 аныяк улус бар. Бо чылын 9-ку классты 12, 11 классты 36 өөреникчи доосканын дыңнаткан.
Сибирьниң федералдыг университединде, эмчи болгаш фармацевтика колледжтеринде, Уралдың күрүнениң юридиктиг академиязында, Новосибирскиниң хем училищезинде, Кызылдың уран чүүл училищезинде, Тываның күрүне университединде өөренип турар студентилер боттарын болгаш өөренип турар черлерин таныштырган.
Чону ажылга хаара тудар төптүң даргазы Шеңне Куулар аныяктарга «Россияда ажыл» шөлчүгежин, күрүнеден көрдүнген деткимче хемчеглерин тодаргай тайылбырлаан.
Спорт болгаш аныяктар-биле ажылдаар килдистиң удуртукчузу Мирослава Дамчат «Добро.ру» эки турачылар шөлчүгежин таныштырган. Кожууннуң төп эмнелгезиниң кол эмчизи Амырта Монгуш келир үениң эмчилеринге төрүттүнген черинче ажылдап кээрин кыйгырган.
Студентилер боттарының үзел-бодалын, сорулгаларын, хостуг үезинде чүнү канчап турарын, келир үеде республиканың сайзыралынга киирип болур үлүг-хуузун ажыт-чажыт чокка чугаалаан.
Ол ышкаш август 12-де демдеглеп эрттирер бүгү делегейниң аныяктар хүнүнүң дугайында хуудустарны үлеп, кожууннуң чараш черлерин тыттырган чуруктарын белекке берген.
Ужуражылганың киржикчилери, ада-иелер аныяк кадрларга чагыг-сүмезин берип, келир үеде Тывага, кожуунунга ажылдап чедип кээрин, кезээде оруу ак болурун күзээн.