Бай-Хаак школазының авиа-угланыышкынныг клазының өөреникчилеринге Космос неделязы Кызылдың аэропортунче экскурсия-биле доозулганын ТР-ниң Орук-транспорт комплекизиниң яамызы дыңнаткан.
Келир үениң ужудукчулары октаргайның болгаш ужар чүүлдүң делегейин боттарынга ажыдып, транспорт комплекизиниң ажылы канчаар тургустунганының, иштики хыналда системазы дээш албан чериниң оон-даа өске ажыл-чорудулгазы-биле танышкан.
Оолдар болгаш уругларга российжи космонавтиканың төөгүзүн, космонавт чаңгыс чер чурттуувус Кирилл Песковтуң дугайында чугаалап берген. Ол ышкаш «агаар хемезиниң» бортунда пассажирлерниң айыыл чок чоруун хандырып турар борт үдекчизи-биле ужуражып, сонуургаан айтырыгларын салган.
«Тываавиа» компанияның төлээлери ужудукчу мергежил-биле таныштырган. Школачылар вертолет ужудукчузунуң кабиназынга олуруп, ооң иштин бүрүнү-биле өөренип көөр аргалыг болган.
Сонуурганчыг экскурсия келир үениң ужудукчуларының хамааты ужар чүүл мергежилин шилип алыр күзелин улам-на күштелген.
Ужуражылганың төнчүзүнде Орук-транспорт яамызының ажылдакчызы аалчыларынга орук шимчээшкининиң дүрүмнерин сагындырып, чырык чайынналдырыкчыларын тывыскан.
Эрткен чылын Таңды кожууннуң Бай-Хаак школазында Тывада бирги авиа-угланыышкынныг классты ажытканын сагындыраал. Авиация клазынче 5 «в» класстың өөреникчилери кирген. Олар келир үеже чугула базым кылган даңгыраан бергеш, шынзылгаларны алган.