ТР-ниң Чазак Даргазының оралакчызының хүлээлгезин күүседип турар Александр Брокерттиң башкарылгазы-биле национал төлевилелдер талазы-биле албан черлер аразының штавының ээлчеглиг хуралы республика чазаанга болуп эрткен.
Александр Брокерт бо хүнде кол сорулга – 2022 чылдың апрель 1-ге чедир национал төлевилелдер объектилериниң керээлерин чарарын чедип алыры дээрзин айыткан. Ол ышкаш керээде чаа негелдени киирген – даштыкы күрүнелерниң база делгей организацияларының талазындан чөрүлдээлиг хөделиишкиннер-биле холбаштыр, Россия Федерациязының национал сонуургалдарын камгалаар дээш, чаңгыс хандырыкчыдан садыгланырын айыткан.
Тыва Республиканың садыглаашкын адырында керээ системазын өйлеп-таарыштырар талазы-биле сайыт Чечек Ооржак Тыва Республиканың Чазаа 2022 чылдың март 18-те 119 дугаарлыг "Чаңгыс хандырыкчыдан (хүлээникчи, күүсекчиден) күрүне база (азы) муниципалдыг хереглелдерге барааннар, ажылдар, ачы-дуза садып алыр таварылгаларны болгаш ону боттандырарының дугайында" доктаал үнгенин удуртукчуларга таныштырган. А сайыттың оралакчызы Мерген Сарыг-оол чаңгыс хандырыкчыны тодарадыр талазы-биле ажылды организастаарының чурумун тайылбырлаан.
2013 чылдың апрель 5-те № 44-ФЗ Федералдыг хоойлунуң 93 чүүлүнүң 1 кезээнде көрдүнген таварылгаларга немей, доктаалда айыттынганы езугаар, 2022 чылдың декабрь 31-ге чедир, тускай Комиссияның протокол шиитпиринге даянып, Тыва Республиканың Чазааның актызы-биле тодараткан чаңгыс хандырыкчыдан (хүлээникчи, күүсекчиден) барааннарны, ажылдарны, ачы-дузаларны чагып алыкчы садып ап болур эргелиин айыткан.
Хуралдың ажылынга Тыва Республикада кол федералдыг инспектор Александр Вавилихин, ТР-ниң Чазак Даргазының оралакчызы Елена Хардикова, ТР-ниң Дээди Хуралының энергетика, тудуг, транспорт база чуртталга-коммунал ажыл-агый талазы-биле комитет даргазы Юрий Ооржак, ТР-ниң Саналга палатазының даргазының оралакчызы Валентина Шыырап, республиканың күүсекчи эрге-чагырга органнарының удуртукчулары база харылзааның өске талазынга – муниципалдыг база хоорай округтар чагыргаларының даргалары база специалистери киришкен.
