Бөгүн Тывада Россияның Буддистер ассамблеязы, РФ-тиң Истелге комитединиң Тыва Республика талазы-биле эргелели, Тываның Арга-арыг болгаш бойдус ажыглалының яамызы, А.С. Пушкин аттыг национал ном саңы, «Да» аптека четкизи тускай шериг операциязында киржип турар дайынчыларга дузаламчыны дамчыткан.
Тываның Камбы-Ламазының оралакчызы Лопсан Монгуш дайынчы хөделиишкиннер девискээринче ачы-дуза чедирер дээш алды катап барып четкенин дыңнаткан.
– Дайынчыларывыс «чажыртынар» четкилерни, генераторларны чагыыр. Шык черге аарый берген оолдарывыс артышты хайындырып ижиптерге, дораан сегий бээрин чугаалап турду. Ол ышкаш чыжыргана үзүн, чулуун чагып турдулар. Бо удаада 2000 ажыг савада эм үнүштү белеткээн бис. Алдын сарыг каттың чулуун изиг сугга хоюткаш ижип болур, өрттенген балыгларга чыжыргана үзүн чаап, ажыглаар – деп, Лопсан Монгуш чугаалаан.
ТР-ниң Камбы-Лама эргелелиниң башкылары тускай шериг операциязының девискээринде чаңгыс чер чурттуг дайынчыларга мөргүлдерни номчуп турар. Цеченлинг хурээзинде дузаламчы чыыр пункт ажылдап турарын сагындыраал.
«Да» аптека четкизиниң удуртукчузу Ичин-Хорлуу Намзырайның дыңнатканы-биле, олар коллективи-биле кемдээшкин алган дайынчыларга чугула херек колдуктааштарны, даянгыыштарны, шарыыр материалдарны, эм-таңны дамчыткан. Ол республиканың өске-даа аптекаларын демнежип, ачы-дуза чыылдазынга идепкейлиг киржиринче кыйгырган.
Тываның Арга-арыг болгаш бойдус ажыглалының яамызының төлээлери Тожунуң арга-арыг даамалынга чыгдынган 20 кил пөш тооруун эккелген. Дайынчыларга эптиг болуру-биле тоорукту үлүглей савалаан.
Истелге эргелели ийи ап чоруп болур генераторну, ном саңы генератор болгаш сес рацияны дамчыткан.
Улусчу фронтунуң Тывада салбырының күүсекчи комитединиң удуртукчузу Саима Далчин Тывада Россияның Буддистер ассамблеязының эки турачыларының удуртукчузу Лопсан Монгушка 35390 дугаар шериг кезээниң командылалындан Өөрүп четтириишкин бижиин тывыскан.
Кижи бүрүзү тиилелгени чоокшулаштырар дээш үлүг-хуузун киирип болур. Күскү ачы-дуза чыылдазы октябрь 22-ге чедир уламчылаар. Чыгдынган ачы-буян чүъгүн 20 тоннаның ийи чүък автомашиназы ийи аңгы угланыышкынче (Курск облазы болгаш Донецк) чедирер.
Тускай шериг операциязында киржип турар эрес-дидим маадырларга деткимче көргүзер күзелдиг улус «Норзин» Садыг төвүнче (Тыва эки турачылар кудумчузу, 3) кээп болур. Харылзажыр телефону: 2-10-50.