Мал ажылының кайы-даа үези чымыштыг, ылаңгыя чазын. Ол үеде мал оолдаашкыны эгелээр.
Өвүр кожууннуң чагырга даргазының хүлээлгезин күүседип турар Айдыс Куулар мал оолдашкынының үезинде чаңгыс-даа баш чидирип алырга харааданчыг дээрзин соцчеткилерде бижээн.
– Тывада мал оолдаашкыны эгелей берген. Кандыг-даа малчынга ол харыысалгалыг болгаш дүшкүүрлүг үе. Кол-ла сорулга – малдың чаш төлүн онча-менди камгалап алыры болур.
Кожуунда «Чаа сорук» төлевилелиниң 2020 чылда киржикчизи Май-оол Донгактың кыштаанда мал оолдаашкыны кидин түлүк. Төрүүр хойунуң 40 хуузу оолдапкан. Эрткен күзүн уксаалыг кошкарны садып алган. Ийи шыырак кошкарны салганындан хураганнарының шыдалы эки болуп турар. Шээр малындан ангыда, 30 ажыг инектиг, 30 ажыг чылгы малдыг. Кышты хүр ажары-биле алды машина сигени белеткеп, немей мал чемин садып алган.
Кыш берге болгаш өөредиглиг болду. Мал бажындан чидириглер турган, ынчалза-даа бо мал оолдаашкынын хайгааралга алдывыс. Мал чеминиң курлавырын артыкшылдыг кылдыр белеткээри чугула дээрзин демдеглекседим.
