Коммунал ачы-дуза төлевиринге он муң рубль деткимче

Тываның Баштыңы долу эвес мөөңнээшкинче кыйгырткан хамаатыларның өг-бүлелеринге коммунал ачы-дуза төлевиринге 10 муң рубль түңнүг чаңгыс катап бээр төлевирни төлээриниң чурумун бадылаар дугайында доктаалга атты салган.

Владислав Ховалыг ону алыр өг-бүлелерниң даңзызы Күш-ажыл болгаш социал политика яамызында барын бодунуң блогунда дыңнаткан. Ук дузаламчы өг-бүле бүрүзүнге четкен турарын чедип алыр даалганы яамы биле республиканың каттышкан штавынга берген.

Регионнуң чазаа ооң мурнунда долу эвес мөөңнээшкинче кыйгырткан хаматыларның өг-бүлелеринге хөмүрнү дүжүргенин сагындыраал. Хереглелдиг 565 өг-бүлеге 3-3 тонна хөмүрнү дүжүрген. Чамдык өг-бүлелер төпчүткен одалга системалыг бажыңнарда чурттап турар болгаш, хөмүрден ойталаан турган.

Ноябрь 26-да Тываның Баштыңы-биле эрткен дорт дамчыдылга үезинде, республика чурттакчыларының айтырыгларының аразында, хөй аал чурттаар бажыңнарда чурттап турарындан дузаламчының ол хевиринден ойталаанын, ындыг-даа болза коммунал чарыгдалдарын эгидип бээр өске дузаламчыга хереглелдиин чугаалааннар. Владислав Ховалыг ол чугула айтырыгга чөпшээрежип, шынны катап тургузар чөптүг шиитпирни хүлээп алырын дыңнаткан.

Тываның Күш-ажыл болгаш социал политика яамызының баш бурунгаар санаашкыннары-биле алырга, долу эвес мөөңнээшкинче кыйгырткан хамаатылар өг-бүлелериниң 130 кежигүнү ол төлевирни алыр. Төлевир алыкчыларының даңзызын тургускан, ам тускай мергежилдиглер төлевирни төлээр аргазын дыңнадып эгелээринге белен дээрзин, яамының удуртукчузу Эдуард Сандан дыңнаткан.

Чаңгыс удаа бээр төлевирниң акша-хөреңгизин Тываның Чазааның курлавыр фондузундан үндүрер.