Коронавирус халдавырындан аараан кижилер саны көвүдеп турар

Росхереглелхайгааралдың Тыва Республика талазы-биле эргелелиниң сан-медээзи-биле алырга, республикада коронавирустан аараан кижилер саны неделя дургузунда ийи катап көвүдээн.

Тываның кол санитар эмчизи Людмила Салчак коронавирус халдавырындан аараан таварылгаларның сан-чурагайын дыңнаткан. Февральдың 4-тен 10-га чедир республикада covid-19-тан аараан лабораторияга бадыткаттынган 301 кижи илереттинген. Ооң мурнунда неделяга деңнээрге (115 таварылга), аараан кижилерниң саны ийи катап көвүдээн.

Кол санитар эмчи бир эвес аарыг өөскүр болза, кызыгаарлаашкынныг хемчеглерни киирип болурун дыңнаткан. Ону киирбес дизе, профилактика хемчеглерин күштелдирип, ону сагыырын шыңгыы хыналдага алыр.

Тываның Баштыңы Владислав Ховалыг бюджет организациялары камгалал маска кедер чурумну, эртенги хыналданы, арыглап-дезинфекциялаар хемчеглерни кылып турарынга хыналданы чорударын негээн.

Ыраккы Мөңгүн-Тайга, Тере-Хөл база Тожу кожууннар дээш, республиканың шупту муниципалдыг 19 тургузугларында коронавирус хамчыындан аараан кижилер демдеглеттинген. Регионнуң найысылалы Кызыл хоорайда эрткен неделяда эң хөй – 178 кижи аараан.

Эмнелгелерде 367 кижи эмнедип чыдар, эрткен неделядан 228 кижи хөй. 278 аарыг кижи амбулаторлуг эмнээшкинде болза, 89 кижи чыдар эмнелгелерде. Алды кижи берге байдалда.

Шагаа, Ада-чурт камгалакчызының байырлалы дээн ышкаш, хөй кижи киржилгелиг хемчеглерни эрттирерде ону өөренип көөрүн, Людмила Салчак дыңнаткан.

Эпидемиологтуг байдалды нарыыдатпазы-биле элээн каш негелделерни тургузар дугайында саналды Тываның Баштыңынче киирген. Мөргүл номнары эртер хүрээлеринде, хөй-ниити транспортунда, хөй кижилер чыглыр черлерде арыглаашкынны шыңгыы хыналдага тудар.

Аарыгның көдүрлүүшкүнүн болдурбазы-биле, уруглар садтарынга эртер байырлалдың эртенги хемчеглеринче база өске-даа оюн-тоглааже уругларның ада-иезиниң чаңгызы киржип болурун чөпшээрээн.

Бо неделяда эпидемиологтуг байдалды көрүп, хемчегни онлайн чурумга эрттиреринге чедир, элээн шыңгыы хемчеглерни киирер.

Байырлал хемчеглерин эрттирерде албан черлериниң эпидемиологтуг айыыл чок дүрүмнерин сагып турарын: камгалал маскалары, дезинфекция холуксаалары, дериг-херекселдериниң барын хынаар, халдавырлыг аарыгларны болдурбас дээн ажылды чорудуп турарынга хыналданы кылырын Владислав Ховалыг бодунуң оралакчызы Юрий Ананьинге дааскан.