Тываже 1900 коронавирус хынаар тест-системаларны Россияның Росхереглелхайгаарал эргелели чоруткан. Ооң 800-н СПИД-центр биле Республиканың халдавырлыг аарыглар эмнелгезиниң лабораторияларынче дамчыткан. Бо ийи лабораторияга кадык хамаатылардан анализтер алыр дээрзин Тыва Республикада күрүнениң кол санитар эмчизи Людмила Салчак дыңнаткан. “Коронавируска хынадып алыр күзелдиг кадык кижилер - студентилер, чурттакчы чон азы айыылдыг бөлүкке хамааржыр 60 хардан өрү назылыг хамаатылар кандыг-даа төлевир чокка эрттип ап болур. Анализ эрттип алыр кижи саны көвүдээр болза, Республиканың кеш аарыглар диспансериниң лабораториязын база курлавырлап алган бис” – деп, Людмила Салчак чугаалаан.
Гигиена болгаш эпидемиология төвүнүң вирусология лабораториязынга тест-системаларның 800-н дамчыткан. Санаторлуг эпидемиология түңнелдери үндүрер ажылдар чорударынга бо үш лабораторияда чогуур дериг-херексел бар. Иркутскиниң чумага удур эртем-шинчилел институдунга тест-системалар-биле ажылдаар 6 айның курстарынче Тывадан ийи лаборант эмчини өөредип чоруткан.
Эпидемиялыг чурттардан келген хамаатыларга 14 хонук дургузунда хайгааралды тургускан. Тывада 62 кижи медицина хайгааралында, оларның 27-ин учеттан ужулган. Бо келген тест-системаларның хемчээли бир неделяга көрдүнген-даа болза, чежези ажыглатына бээри ам бодунда билдинмес, бо сан көвүдеп-даа болур дээрзин Людмила Салчак дыңнаткан.