КОРОНАВИРУС – ШЫҢГЫЫ ХАЙГААРАЛДА

0
40

Таңды кожуунда Россияның өске регионнарындан келген 69 студент бар. Олар боттарын бажыңында аңгылап кызыгаарлаан. Кожууннуң төп эмнелгезиниң, сумуларның фельдшер-акушер пунктуларының эмчилери студентилерниң кадыының байдалын доктаамал хынап, эъдиниң температуразын хемчээп турар.

Кожуунда коронавирус халдавырлыг аарыгның тарап нептерээрин болдурбас талазы-биле чогуур хемчеглер алдынган. Муниципалдыг тургузугнуң деңнелинде онза белеткел чурумун чарлап, ажылчын бөлүктү тургузуп, хөй-ниити массалыг хемчеглерни кызыгаарлаан. Росхереглелхайгаарал республикада халдавырлыг аарыгга, эпидемиологтуг байдалга хамаарыштыр медээлерни болгаш сүмелерни хүн-бүрүде чорудуп турар.

Таңды кожууннуң чагырга даргазы Алик Монгуштуң TMG корреспондентизинге дыңнатканы-биле алырга, кожуунда коронавирус халдавырлыг аарыгның тарап нептерээрин болдурбас талазы-биле байдал шыңгыы хайгааралда:

– Кожууннуң бюджединден камгалал маскаларын даараар пөс садары-биле акша-хөреңгини үндүрген. Өөредилге, культура ажылдакчылары болгаш херээженнер чөвүлелиниң хөй-ниитижилери Росхереглелхайгааралдың сүмелээн материалдары-биле маскаларны даарап кирипкен.  

Бир эвес, часкы дыштанылга соонда, карантинниг хемчеглер уламчылаар болза, башкылар өөреникчилер-биле ырактан харылзажып өөрениринге белен. Өөреникчи бүрүзүнге онаалгалар кылыр логин-парольду чорудуп бээр. Интернет дамчыштыр өөренир арга чок уругларга башкылар онаалгаларны саазынга парлап алгаш, бажыңнарынга чедирер.  

Ниити албан черлеринче хыналда езугаар эрттирер чурумну тургузар ажылдар чоруп турар. Коронавирустуң ылгавыр демдектериниң бирээзи – кижиниң эъдиниң изии улгадыр. Ынчангаш кижи бүрүзүнүң эъдиниң температуразын хынап турар.  

Айыылдыг бөлүкче кирип турар улуг назылыг болгаш чааскаан чурттап турар хамаатыларга дуза чедирери-биле Таңдының Өг-бүлеге болгаш ие-чашка дуза чедирер төптүң ажылдакчыларын болгаш эки турачыларны хаара туткан. Социал ажылдакчылар оларның даңзызын тургускан. Чагыг езугаар хоочуннарга аъш-чем, эм-таң садары көрдүнген. Эки турачылар карантин үезинде сагыыр чурум езугаар камгалал маскалар болгаш хол хаптарлыг болур ужурлуг. Аъш-чем, эм-таңны бажыңның эргин ажыр дамчыдып бээр.

Таңды кожууннуң сумулар даргалары, өөредилге эргелелиниң ажылдакчылары, фельдшер-акушер пунктуларының эмчилери Тывадан дашкаар келген улустуң даңзызын тургузуп, чаартып, кожууннуң төп эмнелгезинче чорудар. Ажылчын бөлүк халдавырлыг аарыгга хамаарыштыр хүннүң-не сайгарылганы кылып турар.

Шончалай ХОВАЛЫГ.

Реклама

ОСТАВЬТЕ ОТВЕТ

Пожалуйста напишите Ваш комментарий
Пожалуйста введите Ваше имя