Тывада ковидтен аарыыр чоруктар саны эвээжээн-даа болза, серемчилелде хора чок дээри ышкаш, аарыгга удур бөдүүн дүрүмнерни сагыырын Тываның кол санитар эмчизи Людмила Салчак хуралында сагындырган.
Эрткен неделяда ковидтен аараан 19 таварылганы илереткен. 100 муң чурттакчы чонга онааштыр алырга, 5,8 кижи аараан. Ооң мурнунда неделяга деңнээрге аарыыр чорук 45,7 хуу кызырлган. Бир хүнде ортумаа-биле үш кижи аарып турар болгаш, эпидемиологтуг байдал көдүрлүп болурунуң айыылы ам-даа бар.
30-49 харлыг кижилерден – 7, а 65 хардан өрү назылыг кижилер аразындан 4 кижи аараан. Эрткен неделяда Кызыл хоорайда 15, Чөөн-Хемчикте – 1, Барыын-Хемчикте – 1, Кызыл кожуунда – 1, Сүт-Хөл кожуунда 1 ковидтээн таварылгалар илереттинген.
34 кижи эмнедип турар, оларның 19-зу чыдар эмнелгелерде.
Мөчээн таварылгаларның чылдагаанын тодарадыр комиссияның медээзи-биле алырга, 2022 чылдың январь 1-ден бо хүнге чедир 45 кижи ковидтен хораан.
Тарылганың долу курузун 105088 кижи алган, а аарыгга удур коллективтиг иммунитет 55 хуу болуп турары – эвээш көргүзүг.
– Бөгүнде коронавируска удур тарылганың база катап тарыдарының темпизин улгаттырар херек. Чүге дизе эмнелгелерде ковидтээн кижилерниң 90 хире хуузу тарытпаан болуп турар. Бир эвес ковидке удур тарылганы азы катап тарыдарын үе шаанда алган турган болза, ындыг таварылгалар болбайн-даа болуп болур турган – деп, Людмила Салчак дыңнаткан.
Россия биле Моолдуң кызыгаарында эрттирилге пунктулары апрельдиң 1-ден катап ажылдап эгелээн болганда, ол ийи чуртче кирер хамаатылар тарыткан турары албан дээрзин Росхереглел хайгааралының регион төвүнүң удуртукчузу сагындырган.
