Корум-чурум үрээшкиннерин болдурбазының хемчеглерин сайгарган чон чыыштары болур

Тываның муниципалдыг тургузугларынга январьның 27-ден февраль 21-ге чедир чон чыыштары болуп эртер. Регионнуң муниципалитеттер девискээрлеринге корум-чурум байдалын чогумчудуп база экижидер хемчеглерни сайгарган ужуражылгаларны организастаар. Бо хемчеглер Тываның Чазааның дужаалы-биле эртип турар болгаш хөй-ниитиниң айыыл чок чоруун хандырарының амгы айтырыгларын хөй-ниитиниң киржилгези-биле сайгарарынче угланган.

Республиканың корум-чурум камгалаар органнарының төлээлери, ол ышкаш Тываның Камбы-Лама эргелелиниң башкылары чыыштарга киржир.

Дыңнакчыларның кол кичээнгейин – орук-транспорт озал-ондактарын кызырарынче, кижиге хамаарыштыр аар болгаш онза аар кем-херек үүлгедиишкиннерин болдурбазынче, ол ышкаш информация-телекоммуникация технологияларын ажыглап тургаш кылган кем-херек үүлгедиишкиннеринге, азы интернет мегелекчилерге удур тайылбыр ажылынче хаара тудар.

Хемчег бүрүзүнүң шупту киржикчилери Тываның Баштыңының Администрациязының база ТР-ниң Чазааның Аппарадында Регионалдыг айыыл чок чорук департаментизинге кылган ажылдарының дугайында илеткээр. 2025 чылдың февраль 24-ке чедир отчеттуг документилерни дужаар.

Бо хемчеглер регионнуң чурттакчыларынга хөй-ниити корум-чурумун хандырар болгаш айыыл чок чоруктуң деңнелин бедидер талазы-биле комплекстиг ажылдың бир кезээ болур.

#Тывачазак #ТМГМедээлер #Тыва #Тывамедээ #Тывадыл #Тывамедиагрупп #Тува