Кош-Ой хемни кежир көвүрүгнү септеп эгелээн

Республиканың чедери берге эң ыраккы сууру – Мөңгүн-Тайга кожууннуң Тоолайлыг сумузунда Кош-Ой хемни кежир көвүрүгнүң септелгези сентябрь 25-те эгелээнин ук кожууннуң чагырга даргазының амыдырал-хандырылга талазы-биле оралакчызы Ужар-оол Ондар @tmgnews17 дыңнаткан.

Тудуг ажылдарын Бай-Тайга кожуундан хууда сайгарлыкчы Ужар-оол Иргиттиң бригадазы чорудуп турар. Тус черниң чурттакчыларын база аар-саар ажылдарже хаара туткан. План езугаар көвүрүгнү октябрь 30-ге чедир ажыглалче киирер.

Ук тудуг организациязы мооң мурнунда-ла кожуунга көвүрүглерни тудуп турган. Тудуг материалдарын шуптузун эккелген. Черле шалыпкын тудугжулар болгаш көвүрүг септелгези шуудай берди. Айыттынган хуусаада ажыл доостурунуң магадылалы улуг.

Чедери берге черлерде малчын коданнарже орук-суурнуң чедингирин Кош-Ой хемни кежир көвүрүг база хандырар.

Көвүрүгнүң септелгезин “2017-2024 чылдарда Тыва Республикага транспорт системазының хөгжүлдези” күрүне программазының шугуму-биле чорудуп турар.