Кожууннарның чаа соңгуткан баштыңнарынга өөредилгелиг семинарны эрттирер

Тыва Республиканың Дээди Хуралының чөвүлелиниң хуралынга парламентиниң октябрь 23-те эртер үшкү ээлчеглиг хуралынга белеткелди колдады чугаалашкан.

Хуралдың эгезинде Дээди Хуралдың Даргазы Кан-оол Даваа Экономиктиг, саң-хөө-бюджет, үндүрүг политиказының, сайгарлыкчы чорук болгаш күрүне өнчү-хөреңгизиниң талазы-биле парламент хораазы (даргазы А.Г. Листков) «ТР-ниң 2024 чылда база 2025 болгаш 2026 чылдарның планныг үезинде республика бюджединиң дугайында» ТР-ниң хоойлузунче өскерилгелер киирериниң дугайында» хоойлу төлевилелин үш номчулгага эки белеткээнин онзалап демдеглээн.

Кан-оол Даваа Тыва Чазактың аппарат хуралынга киришкенин чугаалааш, ооң түңнелдери-биле парламент хораалары регионалдыг күүсекчи органның яамылары болгаш албан черлери-биле кады ажылдажылгазын эптештирерин катап сагындырган. Ол ышкаш депутаттар боттарының соңгулда округтарынга ажылдап чоруп тургаш, ында туттунуп азы септеттинип турар объектилерге ыяап-ла барып, ажылдарның кандыг байдалда чоруп турары-биле таныжарын дааскан. Парламент даргазы депутат эш-өөрүн тыва дылга болгаш этнология талазы-биле диктантыларга идепкейлиг киржиринче база кыйгырган.

Эрткен Чөвүлелдиң протоколунуң бүгү пунктулары күүсеттингениниң дугайында хораалар даргалары илеткээннер. Дээди Хуралдың Күрүне тургузуушкунунуң болгаш тус чер бот-башкарылгазының талазы-биле хораазының даргазы Л.Л. Осмоловская кожууннарның чаа соңгуткан баштыңнарынга өөредилгелиг семинарны октябрь 30-31 хүннеринде ийи бөлүкке эрттирерин дыңнаткан.

Чөвүлелдиң хуралынга тыва парламентиниң неделяда планын бадылаан.