Кызыл хоорайның 20 дугаар школазының өөреникчилери болгаш башкылары «Крымның чазы» деп «телекөвүрүгнү» Мелитополь хоорайның Совет Эвилелиниң Маадыры П.Т. Одинец аттыг Константиновск ортумак школазында өңнүктери-биле эрттиргенин республиканың немелде өөредилге сайзырадыр төвү дыңнаткан.
Дорт харылзаага школачылар Крымның Россия-биле каттышкан төөгүлүг болуушкунун сайгарып чугаалашпышаан, хоорайларының дугайында таныштырып, чогаадыкчы номерлерни күүсеткеннер.
Хемчегниң хүндүткелдиг аалчызы тускай шериг операциязының киржикчизи, Россияның Маадыры Найыр Кыргыс болган.
«Мелитополь хоорайда иштежилеривиске чылыг-чымчак хүлээп алыышкын дээш четтиргенивисти илерреттивис. Моон-даа соңгаар кады ажылдажылгавыс уламчылап, чаа-чаа төлевилелдер боттанырынга бүзүрээр бис. Хемчег бедик деңнелге эрткен болгаш, эп-найыралда, кады ажылдажылгада кызыгаар чок дээрзин катап база бадыткаан» — деп, Кызылдың 20 дугаар школазының башкылары демдеглээн.
