Кундус-Тук азы Кундустуг?

ТР-ниң Дээди Хуралы чурттакчылыг черлер аттарынга хамаарыштыр федералдыг болгаш республиканың документилеринде карышкактарны узуткаары-биле ажылды уламчылап турар.

Күрүнениң географтыг аттар каталогунда частырыглыг бүрүткеттинген дөрт суур бар. Чоокку үеге чедир бо каталогта Кундус-Тук, Чазылары, Арыг-Узю болгаш Бельдир-Арыг деп тыва суурлар аттары бижиттинген турган.

Чугаа Кундустуг (Каа-Хем кожуун), Чазылар (Тожу кожуун), Арыг-Үзүү (Улуг-Хем кожуун) болгаш Белдир-Арыг (Тес-Хем кожуун) суурларының дугайында чоруп турар.

Дилээшкин ажылының түңнелинде, оларның аттарын канчалдыр шын бижиирин бадыткап турар архив документилери тывылган. Чижелээрге, Кундустугга хамаарыштыр медээни Тыва АССР-ниң Дээди Совединиң Президиумунуң 1963 чылда үнген Чарлыының хоолгазындан алган. Чазылар суурга хамаарышкан медээлер 1975 чылда чаа көдээ Советтер тургузарының дугайында үндүрген документиден тывылган.

Ооң соонда Дээди Хурал Геодезия, картография болгаш делгемнер медээлериниң федералдыг эртем-техниктиг төвүнче дилег киирген. Бо ажылдың түңнелинде, Күрүне каталогунда шупту дөрт суурнуң аттары эттинген.