Кунгуртугда өг-бүлеге оюн-тоглаа төвүнде

Чедери берге Тере-Хөл кожууннуң төвү Кунгуртуг сумузунда өг-бүлеге оюн-тоглаа төвү эжиктерин ажыдып, улуг улусту болгаш уругларны хүлээп эгелээн.

Социал керээге үндезилээн күрүне деткимчезиниң ачызында хөй ажы-төлдүг Чингис Бараан-Чигжит ук төптү ажытканын кожууннуң чагырга даргазының экономика, саң-хөө болгаш сайгарлыкчы чорук талазы-биле бирги оралакчызы Тумен Ховалыг дыңнаткан.

– Кожуунда уруглар ойнап-хөгледир чер чок болганы-биле тере-хөлчүлер уругларын Кызылче чедирип турган. Күрүне деткимчези-биле айыыл чок чымчак материалдардан дериг-херекселди садып алдывыс.

«Социал керээ» программаның ачызында өг-бүлеге оюн-тоглаа төвүн ажыдып алганывыс бо. Уругларывыс хостуг үезинде дузалажып турар.

Тере-Хөл кожууннуң чагырга чериниң даргазы В.Д. Мижит төп ажыдарынга оран-саваны аңгылап, улуг деткимчени көргүскени дээш, четтиргенивисти илереттивис – деп, Марина Бараан-Чигжит ажыл-ижин таныштырган.

Өрү шурап ойнаар батуттар, чымчак ойнаарактар, аэрохоккей дээш өске-даа ойнаар чүүлдер-биле төп чепсеглеттинген. Уруглар чук чуңгулардан чүзүн-баазын биче борбакчыгаштарже бадып турарлар. Улуг улус хостуг үезинде даалы, панчык, шыдыраа ойнап, дыштаныр аргалыг.

Өг-бүлеге «Арат» оюн-тоглаа төвүнге хөй эвес улуска өг-бүле байырлалдарын база эрттирип болур. Улуг-биче тере-хөлчүлер үрде манааны төпке мага-хандыр ойнап, дыштанып турарлар.