Кунгуртугнуң эрес-кежээ ногаажы өг-бүлези

Тайга-таңды ажыр Кунгуртугда Чойган биле Чечек Сюрюнмааларның үш ажы-төлдүг өг-бүлези бажыңының девискээринге ногаа, картофель аймаан тарып турар.

Сюрюнмаалар агаар-бойдузу кадыг-дошкун черге уруглары-биле чылыткызынга помидор, перец, огурецти тарып алыр. Огородунда чалдарында редис, морковь, свелка, ногаан кулчаны олурткан. Ол ышкаш “ийиги хлебти” база чедер кылдыр тарып алырлар.

Өгнүң кыс ээзи Тере-Хөлдүң төп кожуун эмнелгезинде фельдшер-лаборант, эр ээзи Кунгуртугнуң уран чүүл школазында техниктиг ажылдакчы. Сюрюнмаалар кожуун, суму чергелиг хемчеглериниң доктаамал киржикчилери.

Тайга-таскыл черде чурттап турар болгаш Чойган Сюрюнмаа балыктап, аңнап, тооруктап турар. Өгнүң кыс ээзи күзүн ажаап алган дүжүдүн болбаазырадып алыр.